Shillong, K’lyngkot 10
U Myntri Rangbah ka Jylla, Conrad K Sangma ha ka sngi Thohdieng u la ong ba ka Sorkar Jylla ka dang bishar ïa ki jingtyrwa ban pynkha ïa ki district thymmai hapoh ka Jylla.
Haba jubab ïa ka jingkylli halor ka jingdawa ban kyntiew kyrdan ïa ka Sohra sha ka District thymmai, u Conrad u la ong ba ka Sorkar ka la ïohpdiang shibun kiba kum kine ki jingdawa na kylleng ki jaka kynthup ïa ka Sohra bad ka Dadenggre.
“Hooid, nga la ong ba ngi kwah ban pynïajan ïa ka jingshakri ka Sorkar sha u paidbah, hynrei ki don shibun ki jingeh kiba ngi ïakynduh bad ngi don ruh ki jingeh ha kaba ïadei bad ka jinglong jong ki jaka bad kiwei-kiwei, ngi hap ban khmih ïa bun kiei-kiei”, u la ong.
Nalor kane u Myntri Rangbah u la ong ba ka jingeh ha ka liang ka pisa ruh ka don. “Kam long kaba suk ïa nga ban shu ai kano-kano ka jingkular ha kane ka khep ba mynta. Ngi hap ban pynlut shibun bah ka pisa, kam dei ba ngi ong hooid ne ong em ïa ka, hynrei kine ki kam ki dei kiba hap ban shong bishar bha bad ki don shibun ki jaka, shibun ki briew kiba hap ban wanrah lang ha kajuh ka jaka, shibun ki rai kiba hap ban shim bad kumta ngi hap ban bishar bha”, la bynrap shuh shuh u Conrad.
Haba kylli la ka Sorkar kan mynjur ban pynkha ïa ka district thymmai shwa u snem 2028, u Myntri Rangbah u la ong ba ka dang kloi eh ban ong eiei ïa kane mynta.
