Shillong, K’lyngkot 10
Ka Kynhun Myntri jong ka Sorkar Jylla ha ka sngi Thohdieng ka la mynjur ïa ka Minimum Wage (jingsiew barit duh) ba dang pynthymmai (revised) bad pynheh ïa ka jinglum khajna ban pynmyntoi ïa kumba 85,000 ngut ki nongbylla sngi ha Meghalaya.
Haba pynpaw ba kane ka dei ka rai kaba kongsan bha jong ka Sorkar, u Myntri Rangbah ka Jylla, Conrad K Sangma, u la ong ba ka jingsiew barit duh ïa ki nongbylla sngi kiba hap ha ka kyrdan Highly Skilled kan long noh ha ka dor T.645 na ka T.586 shisngi, ki Skilled kin ïoh T.605 na ka T.530, ki Semi-Skilled kin ïoh T.565 na ka T.474, ki Unskilled kin ïoh T.525 na ka T.419 shisngi.
U la ong ba baroh ki nongaikam kin hap ban pyntreikam ïa kane ka dor bathymmai, lem kumta ki nongbylla ki dei ban mudui sha ka tnat Labour jong ka Sorkar ba kan leh ïa kaba donkam. Nalor kane, u Myntri Rangbah u la pyntip ba ka Kynhun Myntri ka la mynjur ruh ban pynkylla thymmai ïa ka kyndon hapoh ka ‘The Meghalaya Buildings and Other Construction Workers Regulation and Employment Condition Rules, 2008’.
U la ong ba ka Sorkar ka ju lum ïa ka khajna (cess) bad ïa kane ka pisa la pyndonkam na ka bynta ka jingmyntoi jong ki nongbylla ba la pynrung kyrteng bad ka Sorkar.
U la ïathuh ba ki don kumba 80,000 haduh 85,000 ngut ki nongbylla ba la dep ban pynrung kyrteng haduh mynta bad ka tnat Labour.
U Myntri Rangbah u la ong ba ki don bun ki jingmyntoi ba ki nongbylla ki ïoh, kum ka jingmyntoi ha kaba siew bai leit sumar, ka jingsiew ban phah skul, ban pule ha ki skul bad kolej, bad dei halor kane ka nongrim ba la pynheh ïa ka khajna. Da kane ka jingpynkylla ïa ka kyndon, ka jingmyntoi ka ban leit sha ki longïing bad ki nongbylla ba la pynrung kyrteng kan sa nang kham bun.
U Conrad u la ong ba ka Kynhun Myntri ka la rai ban nang pynbun ïa ki jingmyntoi sha ki nongbylla kiba la pynrung kyrteng ïalade hapoh kane ka kyndon (rule).
