Shillong K’lyngkot 10
U Myntri Rangbah ka Jylla Conrad K Sangma u la ong ba kam don satia ka jingong ba ka Sorkar ka pyrshang ban pynkylla ïa ka Land Transfer Act (LTA) ne ban ïaid lait ïa ki Autonomous District Council (ADC) ha ka jingpyrshang ban pynlang jaka (land bank) na ka bynta ban pynshlur ïa ka jingwan ki nongbei ban plie lad ïa ka Jylla.
U la ong ba ka jingkynnoh bad ki jingsngew pyrshah ïa ka Investment Meghalaya Agency (IMA) kum ka jingtip kaba bakla.
U Myntri Rangbah u la ong ba ka bakla shibun ban ong ba ka Sorkar kan sa pynkylla ïa ka Land Transfer Act namar ka IMA.
“Nga kren shai sha baroh ba kam don satia ka jingpynkylla ïa ka Land Transfer Act bad ka jingkylli kam mih ruh ba ngin ïaid lait ïa ki District Council (Ki Khlieh Nongsynshar/Rangbah Shnong). Ka jingkylli kam mih satia ba ki kompani shimet kin wan bad thied jaka bad kam don ka jingpynkylla ïa kine bad ngin leh eiei hi ruh ïa kane” la ong u Conrad.
U Conrad u la ong ba naduh ka sngi kaba nyngkong, ka jingkylla kaba wanrah ka long ban ailad ïa ka IMA ban thied jaka bad ban pynlang ïa ki jaka kumba leh ka MIDC bad MTDC bad kane ka dei ka agency ka ban kyntiew ïa ka jingbei pisa ban pynmih kam ha Jylla.
Haba batai ïa ka kamram jong ka IMA, u Conrad u la ong “Ka IMA ka long kum kawei pat ka bor treikam jong ka Sorkar Meghalaya. Ka dei ka shnat ha kaba ki briew kin aplai ïa ka jingbit ba kin sdang ïa la ki jong ki kompani bad ruh ban ïoh ïa ki subsidy kiba ka Jylla bad ka Sorkar Pdeng ki ai”.
Shuh shuh u la ong ba mynshuwa ka ju don da ka Single Window Agency (SWA) hynrei ka SWA ka kham pynleit jingmut sha ki karkhana.
“Mynta ngi don ka jingbei ha ka koit ka khiah, ka kam pynmih bording, ka kam jngohkai bad ka pule-dangle. Kumta, ban seng ïa ki jaka pule, ki dei ïa ki ban leit sha ka tnat pule ban ïoh jingbit ne sha ka tnad karkhana lane lada don ba kwah seng Hospital, donkam ban leit sha ka tnat ka Koit ka Khiah lane u dei ban leit sha ka Single Window Agency ban ïoh jingbit. Kumta, namar kine ki jyrwit-jyrwat, ngi la rai ban wanrah noh da ka IMA, ha kaba baroh ki tnat treikam kin ïadon lang” la bynrap u Myntri Rangbah.
