Shillong, K’lyngkot 10
U Myntri Rangbah ka Jylla, Conrad K Sangma, u la pynshai halor ka jingphah shithi sha ki kolej ban pynïasoh noh bad ka Williamson Sangma State University ka ban sa plie paidbah ha ka 13 tarik mynta u Kyllalyngkot.
U la ong ba baroh ki kolej kiba don ha ka Jylla ki hap ban pynïasoh bad ki skulbah (university), bad lada kim pynïasoh bad ka skulbah jong ka Jylla, yn ym lah shuh ban pyllait ïa ki samla pule na jingïaleh ïa ka eksam CUET. U la ong ba ka dei ka mon ka jong ki lada ki pynïasoh bad ka NEHU, ka USTM lane bad ka skulbah jong ka Sorkar Jylla.
“Kam don satia ka jingpynbor ïano-ïano ban pynïasoh bad ka skulbah Captain Williamson Sangma State University, ngi ailad ïa phi ban jied da kaba pynïasoh sha ngi. Kaei ka ban jia lada phi pynïasoh sha ngi, kaba nyngkong eh ka jingïoh-nong ka dei ba phi ïatreilang bad ka Sorkar Jylla ym bad ka Sorkar Pdeng ha kaba ïadei bad ki kam jong ka kolej, kaba ar ka long ba ha ki kolej kiba pynïasoh bad ka skulbah NEHU, ki samla pule kiba kwah ban pule ha kita ki kolej ki hap ban ïakhun ïa ka eksam CUET na ka bynta ban ïoh rung klas”, la ong u Myntri Rangbah.
U la ong shuh shuh ruh ba ha u snem ban wan, kino-kino ki kolej kiba dang pynïasoh bad ka NEHU kin hap ban pynïakhun beit ïa ka eksamin CUET.
“Lada ki samla pule ki wan ban kyrpad ïa nga ban pyllait na ka jinghap leh ïa ka eksam CUET, ngan ym lah shuh ban leh ïa kata namar baroh shi katta la pyllait ïa ki samla pule na ka CUET tang namar ka daw ba ka Jylla kam don la ka jong ka skulbah”, la ong u Conrad.
U la ong ba dei halor jong kine ki daw ba la thoh sha ki kolej ban kyrpad pynïasoh sha ka skulbah jong ka Jylla, bad lada ki mon ban pynïasoh ki lah ban leh, bad lada ki mon ban bteng beit bad ka NEHU ruh ki lah ban leh.
“Ngim pynbor ïa phi, ka dei beit ka rai ba laitluid jong phi, lada phi dang kwah ban bteng bad ka NEHU phi lah ban leh kumta, hynrei ha u snem ban wan kan ym don shuh ka jingpyllait ïa ki samla pule ka Jylla na ka CUET”, u la ong.
Ha kawei ka liang haba pynshai ha kaba ïadei bad ka sngi plie ïa katei ka skulbah, u Myntri Rangbah u la ong ba ka dei ka prokram jong ka Sorkar, ha kaba ka Vice Chancellor kan shimti ban pynïaid ïa katei ka skulbah.
“Ngam tip kaei kaba u (Rakkam) u la kren, hynrei nga ong ïa phi, ka dei ka prokram jong ka Sorkar kaba la khot lut ïa baroh, kynthup ïa ki kynhun Niam bad jingngeit. Kaei kaba yn leh kan long beit kumba ju leh ha kiwei ki prokram, kan don ka jingduwai lang, bad kata kam dei kaba bakla”, la ong u Conrad.
