Jowai, K’lyngkot 12
Ki kynhun ai jingïarap ha ka 11 tarik Kyllalyngkot ki la ïoh ban sei biang sa lai tylli kiwei pat ki metïap napoh ka krem dewïong Tin Kilo ha Umrangso kaba hap hapoh Dima Hasao ka Assam.
Da kane ka jinglap biang ïa kine metïap, ka jingdon jong ki lanot ba la ïoh ban sei na katei ka krem ka la kynjoh mynta sha ka saw ngut baroh.
Ki kynhun ai jingïarap kiba kynthup na ka tnat National Disaster Response Force (NDRF) ha ryngkat ka State Disaster Response Force (SDRF), ki shipai na ka tnat Indian Army, Navy bad Assam Rifles kat haduh mynta ki dang pyrshang borbah ban ïoh sei ïa kiwei met jong ki briew kiba la shah tep hapoh katei ka krem dewïong kaba la ngat ha ka jingshlei um.
Ha ka 11 tarik Kyllalyngkot ha ka por kumba 1:05 mynsngi, ki dkhot ka NDRF hapoh ka jingïalam jong u Inspector RK Singh ki la ïoh ban sei noh ïa ka metïap jong uwei u rangbah uba kyrteng u Suroj Oyori 37 snem rta na sha trai jong kane ka krem. U Suroj u dei u nongshong shnong jong ka Thilapara kaba hap hapoh Sonitpur District ka Assam.
Kawei pat ka metïap ba la ïoh sei ha kane kajuh ka sngi ka dei jong u Lijan Magar, 26 snem rta, na Umrangso, Assam. Ïa ka metïap jong u ruh la ïoh sei na sha trai jong kane ka krem bad aiti noh sha ki bor pulit.
Ha kaba nyngkong, kata ha ka 8 tarik Kyllalyngkot ki kynhun ai jingïarap ki la ïoh ban sei na katei ka krem dewïong ïa ka metïap kaba nyngkong jong u Ganga Bahadur Shreth, 38 snem rta, uba dei na ka shnong Rampur (Dummana-2 Bhijpur) kaba hap hapoh Udayapur district ka Nepal ha ka por 8:45 myntep.
Kine ki dei napdeng bun ngut ki nongtrei par kiba la sahkut hapoh katei ka krem dewïong namar ka jingshlei um kaba la jia naduh ka step jong ka 6 tarik Kyllalyngkot.
