Shillong, K’lyngkot 12
Ka Seng Kur Dkhar Sawkpoh ba kynthup ïa ka Sawian, Phanbuh-Phankon, Ngapkynta bad Kharwanlang ha ka Sngi Saitjaiñ ka 11 tarik Kyllalyngkot, 2025 ka la pynlong ïa ka Dorbar Pyllun ha U Soso Tham Auditorium, Shillong.
Ha katei ka Dorbar Kur ka la don ka jingai burom bad jingai khusnam ïa ki para kur kiba la kynjoh ïa ka 80 snem shaneng.
Nalor kata, ka la don ruh ka jingai khusnam bad ka jingpynkup burom ïa ki samla pule kiba pas bha bad kiba ïoh 90% shaneng ha ka snem 2024 ha ki kyrdan jingpule bapher-bapher haduh Ph. D bad kumjuh ruh ïa kito kiba paw bha ha ka liang ka kam kilan met, sengkam-sengjam bad kiba nohsynñiang sha ka imlang-sahlang.
Ha shwa ban sdang ïa katei Dorbar Kur, ka la don ka jingkyntiew ïa ka Lama Kur ba la leh da i President bad ki Rangbah Kur kaba bud pat sa ka jingrwai Anthem jong ka kur.
La ïoh ïa ka jingkren pdiang sngewbha na ka Laban Unit da u President, u Ma Peter Sawian, ka jingkren lamphang da u President jong ka Seng Kur Dkhar Sawkpoh, u Ma Tainington Ngapkynta, ka jingpyllait ïa ka “Thup Rakhe Jubili Rupa 2024” da u President jong ka Seng Kur Dkhar Sawkpoh.
Hadien kata ka la don ka jingkynmaw bad ai burom ïa ki longshuwa ki bym don shuh (bam kwai ha dwar u Blei) kiba dei ki nongseng ïa ka ‘Seng Kur Dkhar Sawkpoh’, ka jingpynkupburom ïa ki Longkñï bad Longkmie kiba la palat 80 snem ka rta.
Shuh-shuh, ka la don ka jingkren halor ka phang – “Ka Mynta ka pher na ka Mynnor” na ka Kong Alvareen Dkhar Ngapkynta bad ka jngkren halor ka phang “Ka Akor ka Burom, Ka Longbriew Manbriew ha ki longïing longsem ha ki Por Mynta” na ka Kong Pdianglin Phanbuh.
Ha katei ka Dorbar Kur ka la don ruh ka jingpynpaw ïa ka kaiphod halor ka jingtrei kam ka Seng Kur na ka bynta U snem 2024 bad ka jingïoh bad jinglut jingsep na ka bynta ka snem 2020-2024.
La ïoh ruh ïa ka jingkren ai khublei na ka Laban Unit da u Secretary, Bah Rickynelson Sawian bad ka jingpynwai bad kynthoh ïa ka Dorbar da u President, Ma Tainington Ngapkynta.
Ha katei ka sngi, ka Kong Rita Dkhar Ngapkynta ka la pdiang ruh ïa ka syrnot ai khublei na ka bynta u kpaieid u ba la khlad noh, u Dr. Hamlet B. Ngapkynta na ka bynta ka jingnoh synniang ïa ka seng ïa ka kynhun Kur kaba nyngkong eh ha u snem 1999.
