Shillong, K’lyngkot 12
Ki nongïalam ka Mawphlang Block Congress Committee ha ka sngi Saitjaiñ ki la phet noh na kane ka seng da kaba kynnoh ba ki Nongïalam ba halor ki la ai tiket ïa u briew u ba na shabar ka konstitwensi.
Ka Congress ha ka 10 tarik mynta u bnai ka la pynbna ba la ai tiket ïa u Bah George Sun ban ïakhun na Mawphlang-Diengïei konstitwensi uba dei u khun jong u MLA barim ka Nongspung konstitwensi, Bah JA Lyngdoh.
Namar kane ka rukom ai tiket ka bym pynhun, ka Mawphlang-Diengïei Block Congress Committee ha ka 11 tarik Kyllalyngkot ka pynbna ba la khylliap noh ïa ka lama Congress.
Ki nongkitkam jong ka Mawphlang Block Congress Committee hapoh ka jingïalam jong u President Bah Jores Sunn ki la khylliap noh ïa ka lama jong ka Congress hadien ka jingthom da ka bor da ki Nongïalam ba heh jong ka Congress.
“Ha ka jingshisha ka dei mynta ka sngi ban jied kyrtong na ka bynta ka ilekshon napdeng 3 ngut kiba la pan tiket, hynrei ka Congress ka la pynbna noh shi sngi shwa ïa u kyrtong, kata ha ka 10 tarik shwa ban jied ïa u kyrtong da ka Block Congress”, la ong ka kyrwoh na Bah Jores Sunn.
U la ong shuh shuh ba kum ki nongkitkam jong ka Mawphlang Block Congress Committee kiba la trei shitom ha kane ka konstitwensi ki la khot ïa baroh ki nongkitkam naduh ki primary unit da ka jingmynjur lang ban shim ïa ka rai.
“Ngi ieid ïa ka Congress, hynrei da ka jingleh jong kitei kiba halor pat ngim sngewmon shuh ban don ha ka Congress bad da ka jingïarai lang ngi la khylliap noh ïa lama jong ka Congress ha Mawphlang-Diengïei”, u la ong.
Ha kane ka jingïalang ba la shim ïa ka rai ban khylliap lama syndon ïa ka Mawphlang Block Congress Committee, la ïadon lang ruh ki nongkitkam jong ka Mawphlang Block Youth Cong-ress hapoh ka jingïalam jong u President, samla Seros Star Khyriem, ki nongkitkam jong ka Mawphlang Block Mahila Cong-ress hapoh ka jingïalam jong ka President, Kong Aitilang Kurbah.
Ha kane ka sngi ki la jied ruh ïa u kyrtong ban ïa aireng na Mawphlang-Diengïei da u Bah Mawkordor Rynjah ban ïakhun kum u kyrtong shimet.
“Hadien ka jingïatai sani bha, ki nongïalam ka Congress ki la rai ban pynïakhun ïa u Bah Mawkordor kum u kyrtong shimet ha kane ka ilekshon MDC sha ka KHADC na Mawphlang-Diengïei”, la ong kitei ki Nongïalam.
