Shillong, K’lyngkot 12
Ha ka thaiñ kaba tang khyndiat ngut eh ki samla kiba rung sha ki kam liengsuiñ, ka samla Minerva Wahlang (22 snem ka rta) na Nongmensong, Shillong, ka la kynjoh palat ban ïa kaei kaba la khmih lynti.
Ka jingangnud jong ka naduh ba ka dang rit ban her hapdeng ki lyoh ka la kylla long ka jingshisha lyngba ki snem jong ka jingaiti bad jingtrei shitom, kaba pynshisha ba da ka jingaiti lut bad jingpyni lynti, ym don pud bad kano-kano ka thong kaba thmu ka lah ban urlong shisha.
Ka Minerva ka la pyndep ïa ka jingpule Commercial Pilot License (CPL) na ka Chimes Aviation Academy (CAA) ba pawnam ha Madhya Pradesh – kaba long u mawmer ba kongsan ha ka jingïaid lynti jong ka sha ka kam ban kamai lyngba ki kam liengsuiñ. Da ka jingdon ïa ka CPL, mynta ka la pynkhreh ban shim ïa ki lad ki lynti bad ki kompeni liengsuiñ ba pawnam, kaba la nang pynjan shuh-shuh ïa ka ban ñiah ïa ki liengsuiñ Boeing bad ki Airbus.
Haba phai dien halor ka jingjop jong ka, ka samla Minerva ka la pynpaw ka jingsngewnguh ïa U Blei bad ki kmie ki kpa na ka bynta ka jingkyrshan ba khlem sangeh jong ki. Ka la batai ba ka jingïaid lynti ka long kaba jwat hynrei kaba dap da ka jingkmen, da kaba kdew ïa ki jingduna ha ka liang ki jingtip shaphang ki lad ki lynti ha ki kam liengsuiñ ha Meghalaya.
“Ngam shym la ithuh ïano-ïano ha kane ka kam, kumta nga la hap ban shaniah ha ki pilot kiba dei ki ‘Vlogger’. Ka jingpeit ïa ki dur-khih jong ki ka la ai ïa nga ïa ki jingsngewthuh kiba kordor”, ka la ong.
Ka Minerva kaba la pyndep ïa ka jingpule jong ka na Shillong, ka la pynpaw ruh ïa ka jingdonkam jong ki jingïasyllok ba kham biang ha ka liang ki lad wad kam wad jam ha ka Thaiñ Shatei Lam Mihngi.
Ka la bynrap, “Khyndiat ngut eh ki samla na ka thaiñ jong ngi kiba pyrkhat ïa ka kam liengsuiñ namar ka jingduna ha ka liang ka jingkdew lynti. Ka Jylla ka donkam ïa ki briew kiba lah ban pynshai ha kane ka jait kam bad ban kdew lynti ïa ki samla kiba don shisha ïa ka jingthrang.”
Ki kmie ki kpa jong ka, u Satyendra Kumar Joshi, nongsaid aiñ bad ka Kong Meristella Wahlang, ki la pynpaw ka jingsngew sarong halor ki jingjop jong ka khun jong ki.
“Ka la long ka jingangnud jong ka ban long ka ‘Pilot’, ka la ïaid shakhmat bad kane da ka jinglong ba shisha bad ka jingaiti lut. Ngi la ïeng ryngkat bad ka rai jong ka, bad ngi ainguh ïa U Blei na ka bynta ka jingjop jong ka”, ki la ong.
Ha kajuh ka por, ki la kyntu ïa ka Sorkar Jylla ban pynsaphriang jingtip bad ban ai jinghikai ïa ki khynnah samla kiba kwah ban rung ha ki kam liengsuiñ, da kaba ban jur halor ki jingeh jong ka hynrei ruh ka jinglah ban kamai bha na ka.
Ha ka jingshah hikai jong ka ha CAA, ka samla Minerva ka la pyndep ïa bun ki kynta liengsuiñ ki bym lah kheiñ bad pynjanai ïa ka jingtbit jong ka ha ka kam pynïaid liengsuiñ, ka jingshngaiñ nalor kiwei-kiwei. Ki jingjop jong ka, ki pynlong ïa ka kum ka sharak jong ka jingai mynsiem, khamtam ïa ki samla kynthei ha ka kam kaba kham bun kiba shakri ki dei ki shynrang.
Ka jingjop jong ka samla Minerva ka wan ha ka por ba ki kam liengsuiñ jong ka India ki dang sakhi ïa ka jingroi kaba sted bad ka jingkiew ha ka liang ka jingmihkhmat jong ki kynthei. Ka jingïaid lynti jong ka, ka ïeng kum ka jingpynshisha halor ki lad ki lynti kiba nangroi na ka bynta ki kynthei bad ka bor jong ka jinglah ban ïaleh pyrshah bad ka jingkut jingmut.
Katba ka dang ap ïa ki jingplie lad ha ka liang ka jingthung kam na ki kompeni liengsuiñ ba pawnam, ka samla Minerva ka la pynkhreh ban shim ïa ka sienjam kaba bud jong ka, ban her shajrong, da ka jingkut jingmut ban wanrah ka jingsarong ïa ka Jylla bad ka thaiñ baroh kawei.
“Ngi sngew sarong ïa ka bad ngi ngeit ba kan dang wanrah shuh ïa ka burom sha ka Jylla,” la ong ki kmie ki kpa jong ka.
Ka khana jong ka Minerva Wahlang ka long ka jingpynkynmaw kaba khlaiñ ba ki jingangnud, wat la ki long kiba khraw katno-katno ruh, lah ban pynurlong ïa ki da ka jingïaishah bad ka jingkyrshan. Ki jingjop jong ka kim dei tang ki jong ka marwei hynrei ki long ka jingsarong bad jingai mynsiem ïa ka thaiñ baroh kawei.
