Shillong, K’lyngkot 12
Ar ngut ki samla rangbah kiba long ruh ki kyrtong jong ka Congress ban ïa aireng ha kane ka ilekshon MDC ka ban long ha u Rymphang, ki la shah thung kum ki President ba thymmai jong ka Block kaba ki mihkhmat.
Ha ka kyrwoh khubor ba la pyllait da ka Meghalaya Pradesh Congress Committee (MPCC) la pyntip ba la dep ban mynjur ïa ka kyrteng jong u Bah George Clarence Sun kum u President jong ka 24-Mawphlang Block Congress Committee (MBCC) ban shimti ha ka jaka jong u Bah Jores Sun. Nangta, na ka liang jong ka MPCC ka la bthah ruh ïa u Bah George ba un phah noh ïa ka thup kyrteng jong ki nongkitkam na ka bynta ban ïoh jingmynjur na ka MPCC.
Kumjuh na ka liang ka MPCC ka la pyntip ruh ba la dep ban mynjur ïa ka kyrteng jong u Bah Nathaniel Rymmai kum u President jong ka 23-Sohïong Block Congress Committee (SBCC) ban shimti ha ka jaka jong u Bah S Osborne Kharjana. Nangta, ka MPCC ka la bthah ruh ïa u Bah Nathaniel ba un phah noh ïa ka thup kyrteng jong ki nongkitkam na ka bynta ban ïoh ka jingmynjur na ka MPCC.
Lah ban pynkynmaw ba ha ka thup kyrteng jong ki kyrtong ban ïakhun ïa ka ilekshon MDC ba la pynbna da ka Congress, la jied ïa u Bah George Clarence Sun kum u kyrtong ka 21-Mawphlang-Diengiei Konstitwensi bad Bah Nathaniel Rymmai kum u kyrtong na ka Sohïong Konstitwensi.
Ka lyer ilekshon MDC ha Mawphlang-Diengiei Konstitwensi ka la sdang ban shongshit hadien ka jingpynbna ïa ka kyrteng jong u Bah George, uba dei ruh u khun jong u Myntri barim ka Sorkar Jylla bad MLA barim ka Mawphlang Bah John A Lyngdoh.
Kumta kiba bun na ki paidbah ki la pynpaw ka jingkmen ban ïohi ïa ka kyrteng jong u Bah George bad ong ba u long shisha u samla rangbah uba trei shitom bad uba ïajan bha bad ki paidbah ha ki kam bapher bapher.
