
Shillong, K’lyngkot 13
Ka Hynñiewtrep Integrated Territorial Organisation (HITO) Ribhoi District ha ryngkat ka jingsynranlang da ki nongïalam ka Sengkmie, ha ka step phyrngab jong ka 13 tarik Kyllalyngkot 2025 ki la leit ban hiar kynsan sha Byrnihat ban talasi ïa ki kali kit syiar kiba wan nabar ka Jylla khlem ka jingbud ryntih ïa ki rukom treikam ne ki Standard Operating Procedure (SOP) kiba dei ban bud thik-pa-thik.
Kane ka jingleit hiar kynsan ka seng ka dei kum shibynta ban buddien ïa ka jingujor kaba ka seng ka la ujor sha u Deputy Commissioner ka Ribhoi District ha kine ki khyndiat sngi ba la leit noh halor ka jingshah kjit pisa jong ki kali kit syiar na ki ‘High Level’.
Ha katei ka jingtalasi jong ka seng, ka la ïoh ban bat ïa kitei ki kali bad ka la ujor ruh da ka ejahar ha ka thanat Byrnihat pyrshah ïa ki kali kit syiar kiba wan lyngba ka Jylla Assam ki bym bud satia ïa ki SOP lane ban don ïa ki kot ki sla kiba biang ruh na ka bynta ban wan kit ïa ki syiar sha ka Jylla.
Shuh-shuh, na ka liang ka seng ka la lap ruh ba kitei ki kali kit syiar kiba wan rung sha kane ka Jylla ki hap ban siew ïa ka pisa kaba kot sha ka T.30 haduh 35 hajar kawei ka kali Pickup sha ki High Level. Kumta na ka liang ka seng ka la buh ïa ka jingdawa hakhmat u Officer In-charge ka thanat Byrnihat ban buddien bad ban peit pyrman ïa kum kine ki jait kam.
“Ka don shisha kum kata ka jingshim ïa ka jingwan rung ne ka jinglum ïa ka pisa kaba long haduh T.30 hajar na kawei ka kali Pickup ïa kaba la leh na ka liang ki ‘high-level’ kiba ngi ruh ngim tip mano kita ki ‘high-level’ hynrei ka don kum kata ka rukom treikam jong ki”, ong ka seng.
Na ka liang ka seng ka la ïathuh ruh kaba lyngngoh ka long ba ki pulit kiba don ha ka kamram, ki la pynphai biang ïa kitei ki kali sha ka jaka kaba ki wan kiba don kumba hynñiew tylli ki kali kit syiar ha shwa ban poi ha thanat Byrnihat, katba ha kiwei pat ki sngi kitei ki kali ki lait beit khlem shah pynphai bad kane ka pynpaw ba ka don kaei-kaei sha lyndet jong kane ka jingleh ki pulit.
Ha katei ka jingleit jurip da ka seng, la ïathuh ba ka la ïatyngkhuh kam ruh bad uwei u pulit ba kum ka seng kam kwah ban pynpaw kyrteng satia uba la shoh khawiang bad buaid jawsheh hynrei ka seng ka la dawa ïa ka tnat pulit ba kan pynshitom mardor ïa une u briew namar ka jingbym burom shuh jong u ïa ka ‘uniform’ wat hapdeng ba u don ha ka kam.
Na ka liang ka seng ka la kyntu jur ruh ïa ka tnat Animal Husbandry & Veterinary (AH & V) ba kan khmih sani bha bad ban pynthikna ïa ka koit ka khiah jong ki mrad bam doh kiba wan poi sha ka Jylla Meghalaya khnang ba kan long ka jingshngaiñ ïa ki paidbah kiba bam ïa ka doh.