Shillong, Ïaïong 21
U Symbud Myntri Rangbah ka Jylla uba dei ruh u Chairman ka West Jaiñtia Hills Regional Committee, Bah Sniawbhalang Dhar u la ong ba ka jingïakren bad ka Assam halor ka jingpynbeit pud kan sa sdang biang ynda la thaw ïa ka Sorkar thymmai ha kane ka Jylla ba marjan.
“Ka jingïakren bad kiba na shiliang ka dei ka kam kaba ïai bteng. To ngin ïai ap ynda la thaw ïa ka Sorkar thymmai ha Assam, sa shisien ngin sa bteng biang ïa ka jingïakren. Kata ka long kaba shai bha,” la ong u Bah Dhar ha ki nongthoh khubor ha ka Sngi Ba-ar.
U la ong ruh ba ka jingïakren kaba bud kan shong ha ka Assam ban thaw ïa ki ‘Regional Committee’ jong ka.
“Kumba ka long mynta, ngim pat tip mano ban long Chairman na ka liang jong ki namarba ïa ka Sorkar thymmai yn dang hap ban thaw. Tang ynda ki la thaw ïa ka Sorkar thymmai, kin sa thaw ïa ki ‘Regional Committee’. Kin sa shim ïa ka rai hashuwa ba ngin ïakynduh biang,” u la ong.
Haba kylli la yn lah ne em ban pynbeit ïa kane ka kam hashuwa ka ilekshon sha ka Ïingdorbar Thawaiñ ka Meghalaya ha u snem 2028, u Bah Dhar u la ong ba kam don kano-kano ka por ba la buh.
“Em, ngi ïai pyrshang beit ban pynbeit ïa kane ka mat. Namarba ka kynthup ïa baroh ar tylli ki Jylla, ngi pyrshang ban pynbeit kloi ïa kane ka kam hynrei kam long kaba suk,” u la ong.
“Ngam lah ban ong la ngi lah ban pynbeit hapoh ar snem ne hapoh ar bnai, hynrei ngi ju pyrshang katba lah (ban pynbeit kloi ïa ka),” u la bynrap.
