Shillong, K’lyngkot 13
Ka jingïoh na ki jingmih (revenue receipts) jong ka Khasi Hills Autono-mous District Council (KHADC) ka la nang hiar da 49 per cent kata, na ka T.127.85 klur ha u snem 2017-18 sha ka T.64.66 klur ha u snem 2018-19.
Kane ka la paw ha ka kaiphod Comptroller and Auditor General of India (CAG) jong utei u snem.
Ka jinghiar ka jingïoh na ki jingmih jong ka Council ha u snem 2018-19 ka dei namar ka jinghiar ki jingïarap pisa (grants-in-aid) kumba 69 per cent bad kumba 68 per cent ka jinghiar ha ka jingïasam ïa ki jinglum khajna na ki marpoh khyndew, la ong ka kaiphod CAG.
Ka jinghiar ka grants-in-aid ka dei namar ka jingbym pyllait ïa ka pisa da ka Sorkar Pdeng hapoh ka excluded area/Part IX&IX A jong ka Riti Synshar ka ri India.
La ong ba ka jinghiar ka jingïasam ïa ki khajna na ki marpoh khyndew ka dei namar ka jingbym ïohpdiang ïa ki khajna na ki marpoh khyndew na ka bynta u snem 2018-2019. La pyni ba ha u snem 2018-19, ka jingïasam ïa ka grants-in-aid (T.9.95 klur), ka jingïohlum na ki marpoh khyndew (T.22.72 klur) bad ka jingïasam ïa ki khajna na ki kali (T.12.74 klur) kaba long 70 per cent na baroh ka jingïoh lum ïa ki jingmih (total revenue receipts) kaba long T. 64.66 klur jong ka KHADC.
Ka kaiphod CAG ka la ong ruh ba ka jingpynlut ka KHADC ka la nang kiew da 27 percent na T. 45.95 klur ha u snem 2017-18 sha ka T.58.58 klur ha u snem 2018-19. Kane ka jingkiew ka jingpynlut ka dei na ka daw jong ka jingkiew ha ka jingpynlut ha kaba ïadei bad ka tulop bad ki jingpynlut ha ophis hapoh ka Secretariat General Services na ka T.18.39 klur ha u snem 2017-18 sha ka T.22.75 klur ha u snem 2018-19 kaba long 24 per cent.
