Shillong, Nailur 14
Ka Khasi Jaiñtia Deficit School Teachers’ Associa -tion (KJDSTA), ha ka 14 tarik u Nailur 2026, da kaba pynpaw ba kam ong eiei ïa ka jingdawa ka Voice of the People Party (VPP) ban weng ïa u Vijay Kumar Mantri na ka kam kum u Commi-ssioner and Secretary ka tnad pule puthi ka Sorkar Jylla, ka la ther tyngeh ïa u Bah Lahkmen Rymbui, u Myntri ba dei khmih ïa ka tnad pule puthi u ba la kren ïada ïa utei u Ophisar IAS.
Haba kren sha ki nongthoh khubor, u Bah Boswell Pala, President ka KJDSTA, u la ong ba dang ha ka 01 tarik u Nailur 2026 ka Associa-tion ka la leit ïakren ïa u Commi-ssioner and Secretary halor ki mat kiba ktah ïa ki nonghikai Deficit bad ka pule puthi ba kynthup ka jingslem ban pyntreikam ïa ka Centralized Provident Fund (CPF), ka National Pension System (NPS), ka jingbym pyllait ïa ka Dear-ness Allowance (DA) nalor ka jingsngew -khia ïa ka Structured Pay Framework lane ka CPF.
Shuh-shuh halor ka jingkam ba u Vijay Kumar Mantri u dei u Ophisar uba trei shitom, uba don ka jinglah ban treikam, u Bah Boswell u la ong ba bun ki rai kiba la shim ha ka jingïalam u Vijay Kumar Mantri kum u Commissioner and Secretary ki la wanrah jingktah ïa ki nonghikai Deficit bad ïa ka Education System ha ka Jylla.
U la ong ba u Vijay Kumar Mantri kum u Commissioner and Secretary, khlem ka jingbthah kiba don ha ka Sorkar bad ki briew kiba don ha ka bor hi un ym lah ban wanrah ïa ki rai kiba ktah ïa ki nonghikai bad ka pule puthi ha ka Jylla. “Lada kita ki jinglah treikam u Commissioner and Secretary kumba kdew u Myntri ki dei ban pynmong bad pynwit ïa ki nonghikai, ka Association kam lah ban pdiang satia” u la ong.
Da kaba kdew ïa ka Provident Fund Act 1969, u Bah Boswell u la ong ba ka dei ban don ka Board of Trustees ka ban pynïaid ïa ka pisa CPF pynban la don da ki briew ki bym dei ban don bynta kaba pynpaw kum ka kam bamsap bad bynrap ba ka jinglah ban thok ym dei ban ñiew kum ka jinglah ban treikam.
U la kynnoh ba ka CPF Scheme ba thymmai kam shong nongrim katkum ka Provident Fund Act of 1969 bad ka wanrah jingsngewkhia halor ka CPF Contribution jong ki nonghikai. Shuh-shuh une u nongïalam ka Association u la ong ba u Commissioner and Secretary u ïalam bakla ïa ki nonghikai halor ka CPF Contribution ka PRAN Registration bad kiwei-kiwei pat ki rai.
Nalor kane, u Bah Boswell u la kynthoh ruh halor ka Chief Minister’s Impact Guidebook, da kaba ong u Commissioner and Secretary u dei u Architect jong ka bad mano ba poi pyrkhat ba la thoh ba ka jingthmu ka long ban ïarap ïa ki khynnah ban ïoh khyndiat eh ruh 67% ha ki eksam SSLC bad bynrap ba ym don jingpyrshah ïa ki khynnah ba kham tlot ha ka pule puthi ban pass ïa ka eksam, hynrei ka Guidebook ka pynshlur ïa ka rukom pule ban shu kynmaw khlem da don ka nongrim.
