Shillong, Nailur 14
Ki paid ka Raid Madan Kyrdem hapoh ka lama jong ka rynsan u paidbah, ha ka 14 tarik u Nailur 2026, ki la phah kyrwoh ïa ka Hima Khyrim Syiemship, ban leit kyntu ïa ka KHADC ba kan pynlong noh ïa ka ilekshon ban jied ïa u Sordar.
Ka Raid Madan Kyrdem ha u snem 2019 ka la pynlong ïa ka ilekshon Sordar na bynta ka samoi treikam kaba san snem, ha kaba u Bah R. Mording Dorphang u la long u nongjop da kaba pynliem ïa u Bah Pholning Makdoh, hynrei tang hadien shisnem eiei, ka la mih ka jingbthah ha kaba ka Hima Khyrim Syiemship ka la weng noh shipor ïa u Bah Dorphang bad ban aiti ha u Bah Makdoh ban long kum u Acting Sordar haduh kine ki sngi kaba la tam ïa ka snem treikam.
Kumta ki paidbah kiba shong basah ha u pud u sam ka Raid Madan Kyrdem ha ka lama Rynsan U Paidbah, ki la pynpaw ka jingangnud ban ïoh noh da u Sordar ba pura.
Haba kren sha ki lad pathai khubor u Bah Stebor Kharsati, President ka kynhun u la ong ba ki paidbah haduh kine ki sngi ki dang sah hi ha ka umdum bad ka jingshah sospon u Sordar ba pura. Ki angnud ba mynta hadien ba la kut ka samoi treikam, kin ïoh noh ban leit sha ka ilekshon jied Sordar ba pura ka Hima.
U la ong ruh ba ki paidbah ki kyrpad ïa ka Hima Khyrim, ba kan kyntu noh ïa ka KHADC ban pynlong noh ïa ka ilekshon kumjuh ruh ban pynsngew ba kum ki paidbah, ki kwah ba kan don noh ka synshar kaba khuid ym kum ha ki por ba la dep.
Haba bynrap ïa ka jingkren u Bah Stebor, uwei na ki nongshong shnong u la pynsngew, ba ki paidbah hi ki kwah ïa ka synshar khadar kaba khuid.
