Shillong, Nailur 14
Ka jingmad jingeh ba la slem jong ka nongbah Shillong haba ïadei ka jingkhapngiah ki kali bad ka jingkyntur sha ki lynti ïaid kjat kan sa kham thanda nangne shakhmat naba ka Sorkar ka la pynkynriah ïa 785 ngut ki nongdie madan na ki lynter lynti jong ka khaïi-pateng ba hui-hui sha ki 6 tylli ki ïew die jingdie ba la buh kyrpang na bynta ki nongdie madan ha ka nongbah.
Ïa kane ka jingpyn-kynriah, la ong ki heh ophisar, la leh hadien ba la ïamir jingmut bad ka Provisional Town Vending Committee (PTVC) bad da kaba buh jingmut ïa ka jingsuk jong ki paidbah bad ka bha ka miat jong ki nongdie jingdie.
Katkum ka jingong jong ki heh ophisar, ïa kane la leh ha ki lai bynta ha kane ka shisnem ba la dep.
Ka la sdang na Khyndailad, ka jaka khaïi-pateng kaba khapngiah tam ha ka nongbah, ha kaba la pynkynriah ïa 387 ngut ki nongdie madan sha ka jaka ïeng kali jong ka MUDA ha ka 23 tarik u Naitung, 2025.
Hadien kane, la pynkynriah sa ïa ki nongdie madan na MTC, Jail Road bad Polo sha ka Polo Hawkers Market bad sha ka jaka ïeng kali jong ka SMB kaba don mar-pyrshah ka SBI Main Branch ha ka 28 tarik u Naitung, 2026.
Ïa ka kylla kaba khatduh la pyndep ha ka 17 tarik Nailar, 2026, ha kaba ïa ki nongdie madan kiba ha Laitumkhrah, Dhankheti, Malki, Barik, Laban bad Last Stop la ai jaka ha Brightwell Campus Hawkers Market kaba dang shu shna thymmai bad ha SMB Parking Lot ha Dhankheti.Da kane, baroh 785 ngut ki nongdie madan mynta la ai bynta ha kylleng ki 6 tylli ki jaka – 387 ngut ha MUDA Hawker Market, 138 ngut ha Brightwell Campus, 119 ngut ha Polo Hawker Market, 75 ngut ha SMB Parking Lot mar-pyrshah ka SBI, 37 ngut ha SMB Parking Lot, Dhankheti, bad 29 ngut ha PWD Campus, Barik.
Ki heh ophisar ki la ïathuh ba man la uwei-pa-uwei u nongdie uba dei hok la ai ka jingkyrshan pisa kaba T.20 hajar hapoh ka ‘Chief Minister’s Urban Livelihood Grant’ kum ka lad jingïarap ban pynbha pat.
“Ka jingthmu ka long ban pyntikna ïa ka jingpynïaid kali kaba kham bha, ban pynbha ïa ka leit ka wan, ka ïaid ka ïeng ki nongleit-nongwan bad ban pynneh ïa ka jingpyndonkam kaba ryntih ïa ki jaka paidbah; ha kajuh ka por ban ïada ïa ka lad kamai jong ki nongdie madan lyngba ka jingpynbha bad ka jingkyrshan pisa,” la ong uwei u heh ophisar.
