Shillong, Nailur 14
Ka Directorate of Health Services (DHS) kan pynmih thymmai ïa ka thup bhah pule MBBS bad BDS u snem 2026-27 lashai ka sngi hadien ba weng noh ïa ka thup bala pynmih kham hashwa da ka jingujor pyrshah ka Jaiñtia Students’ Union (JSU) kaba la kynnoh ba don ka jingpynkheiñ ïa ka rukom sam bhah bhah pule.
Ka Director ka tnat ka Koit ka Khiah, Dr. L Mylliem Umlong ka la kular ïa kane hadien ka jingïakynduh bad ka JSU ha ka sngi Nyngkong, hadien ba ka seng ka la kdew ïa ki jingbym bud ryntih ïa ka bhah pule Doctor katkum ka jingpynbna No. DHSMER. 150/MBBS Admission /2026-27/5607.
Ïa ka kynhun ka JSU la ïalam da u Education Secretary samla Bocheru Mi Pohsnem ryngkat u Assistant Secretary samla Pynshailang Suliang, Exe -cutive Member samla Borntifulson Rupon bad u samla Jefferson Shylla.
Ka JSU ka la kynnoh ba ka tnad ka koit ka khiah ka ai bhah pule (seat) ha ki jaka pule kum ka NEIGRIHMS sha ki kyrtong kiba kham duna marks ha ka eksa-min NEET katba kala kyntait pat ïa ki kyrtong kiba kham heh marks kiba kwah pule ha kane ka juh ka jaka pule.
“Kum ka nuksa, uwei u kyrtong serial no. 30 uba ïoh 439 marks u la ïoh bhah ban pule ha NEIGRIHMS, hynrei katto katne ngut ki kyrtong kiba kham heh marks kiba la jied ïa ka NEIGRIHMS kim shym la ïoh bhah pule. Kane ka dei ka jingpynkheiñ ïa ka bhah pule katkum ka jinglah jong ki (merit),” la ong ka JSU.
Ka JSU ka la kynnoh ruh halor ka jingbym pyllait paidbah ïa ka Standard Operating Procedure. Ka la ong ba watla ka la ai jingmut ha u snem ba la dep bad buddien lyngba ka email, hynrei ïa ka SOP ba la pynthymmai ba la kular da ka tnad ym shym la pyllait paidbah.
“Ki heh Sorkar ki la kam ba ïa ka jingai bhah la pynlong katkum ka SOP ba dang mynjur thymmai kaba ym shym la pyntip sha ki paidbah. Ki la leh khlem ïaid katkum ka rukom pyntreikam kaba shai kaba la buh ha u bnai Nailur, 2025,” ong ka JSU.
Ka JSU ka la ong ba kan dang peitngor haduh ban da pyndep ïa kane ka kam ha ka rukom kaba hok bad kaba khuid.
“Ka jingdawa jong ngi ka long kaba suk, ym dei ban leh shiliang, ym dei ban ai bhah kyrpang. Ka jingai bhah ka dei ban long kaba pyrkhing bha bad ka dei ban long khuid, kaba shai bad ka dei ban burom ïa ka jingjied ïa ki jaka pule ba la jied da ki samla pule bad ka dei ban bud ïa ka SOP,” la bynrap ka JSU.
