Shillong, K’lyngkot 13
U Myntri Rangbah ka Jylla, Conrad K. Sangma ha ka Lah Sngi U Blei u la plie ïa ka skulbah banyngkong eh ba long trai da ka Jylla – “Captain Williamson Sangma State University” ha ka jingdon lang u Lamphang ka Ïingdorbar Thawaiñ, Thomas A. Sangma, Symbud Myntri Rangbah ka Jylla, Bah Snaiwbhalang Dhar, Myntri ka tnad pule-puthi, u Rakkam Sangma bad u Myntri ka tnad bording, Abu Taher Mondal.
Ïa ka jingtei jong ka skulbah la plie ha u bnai Kyllalyngkot, 2023. Ha u bnai Jylliew, 2018, la sdang ïa ka jingmynjur ban tei ïa ka ha ka jinglut kaba T.16.96 klur.
Ïa kane ka skulbah la jer bad ai nam ha ka kyrteng jong u Myntri Rangbah banyngkong eh ka Jylla, u Captain Williamson A. Sangma.
Ha u snem 2011, ïa ka jingseng jong kane ka skulbah la thmu nyngkong kum ka Captain Williamson Sangma State Technical University ban pynïasoh ïa ki Technical College ha ka Jylla. Hynrei ha u snem 2022, ka Sorkar Jylla ka la hap ban pynkylla kyrteng noh ïa kane ka skulbah sha ka Captain Williamson Sangma State University, khnang ban pyntikna ba baroh ar jait ki kolej (‘Technical’ bad ‘Non-Technical’) kin lah ban pynïasoh.
Da kaba ñiew ïa ka jingplie jong kane ka skulbah kum ka “Red Letter Day”, u Myntri Rangbah ka Jylla u la ong, “Ka skulbah kan ym pynbiang tang ïa ki jingpule kiba kham shalor hynrei kan kyntiew ïa ka jingwad bniah bad ka jingpynmih ïa ki jingmut bathymmai, ban pyntikna ïa ka jingkylla ha ka jinglong-jingman ka pule-puthi jong ka Jylla.”
U la ong ruh ba ka jingpyntreikam ïa kane ka skulbah ka dei ka jingkular jong ka Sorkar na ka bynta ki paidbah ka Jylla.
“Ha ki 50 snem tam ba ka Jylla ka la don, kam shym la don la ka jong ka skulbah. Ka jingseng ïa ka skulbah jong ka Jylla lajong ka long ka sakhi ïa ka sienjam jong ka Sorkar jong ngi ban kyntiew ïa ka jingroi bad jingkiew ha ka liang ka pule-puthi”, ong u Myntri Rangbah.
“Kane ka skulbah kam dei tang ha ka kyrteng; ka long ka jingkular. Ka jingkular jong ka jingkyrmen, ka jingroi, bad ki lad ki lynti ki bym don pud na ka bynta ki paidbah ka Meghalaya,” u la bynrap.
Halor ki jingeh ha ka tnad pule-puthi, u Myntri Rangbah u la pynpaw ïa ka jingkyrmen ba katba ka Jylla ka nang jam shaphrang, ka jinglong-jingman jong ka pule-puthi jong ka Jylla kan nang kiew arted-arted.
“Ngi dang don bun ki mer ban ïaid, hynrei da ka jingkut jingmut, ngin pynlong ïa kane ka skulbah kum ka sharak jong ka jingnang jingstad bad ka jingsarong na ka bynta ka Jylla jong ngi,” u la ban jur. U la pynbna ba yn sa pynïeng ruh ïa ka Shillong Campus jong ka skulbah, ka ban pynsuk ïa ka rukom pynïaid kam bad ka jinglah ban ïoh rung jong ki samla pule na ka Ri-lum Khasi bad Jaiñtia.
“Ka skulbah kan sdang ïa ka jingtreikam jong ka nangne shakhmat bad baroh ki kolej hapoh ka Jylla ki lah ban jied ban pynïasoh bad ka skulbah jong ka Jylla,” u la pyntip, haba pynpaw ba ka jingpynïasoh bad ka skulbah jong ka Sorkar kan pyntikna ba ki samla pule kin ym donkam ban ïakhun ïa ka Common University Entrance Test (CUET) na ka bynta ki jingpule ‘Under Graduate’ bad ‘Post Graduate’ ha ki kolej kiba ïasoh bad ka Captain Williamson Sangma State University. U la pyntip ruh ba ka CUET kan treikam ha ki kolej kiba pynïasoh bad ka North Eastern Hill University (NEHU), Shillong.
“Nga kyntu ïa ki kolej ban shim ïa kane ka kabu bad pynïasoh bad ka Captain Williamson Sangma State University,” u la ong da kaba bynrap ba ka Sorkar Jylla kan kyrshan ïa ki jaka pule ba pynïasoh ha baroh ki liang, kumjuh ban pyntikna ïa ka jingroi jong ki.
U la ong ruh ba ka Sorkar ka la shimkhia ban khmih ïa ki jingeh ha ka liang ka pule-puthi bad kan pynbeit ïa ki lad ki lynti ban pynthikna ïa ka jingkitkhlieh bad ka jingpynïaid kam haba ïadei bad ki jingshakri pule-puthi kiba paka ha ka Jylla.
“Ka lynti shakhmat ka long kaba eh, hynrei ryngkat ka kynhun kaba biang, ka jingïohi jngai, bad ka jingkut jingmut, ngin jop ïa kine ki jingeh,” u la bynrap.
Ka Prof. Vasanthi Vijayakumar, ka Vice-Chancellor ba dang shu shah thung thymmai jong ka Captain Williamson Sangma State University ka la ong ba kane ka skulbah kan ai ïa ka jinghikai kaba paka bad kyntiew ïa ki kam wad bniah kumjuh ïa ka roi ka par kaba pura.
Ha kane ka jingïalang, la sakhi ruh ïa ka jingaiti ïa ki aplikeshon pynïasoh na ka liang ki kolej bapher-bapher ka Jylla, ba kynthup ïa ka Williamnagar College, Williamnagar, Captain Williamson Sangma College, Baghmara, Rongjeng Model College, Rongjeng, Ampati Degree College, Ampati, PA Sangma Abong Noga College, Tura, Mason Philips Academy, Tura, Mirriam Rural Women’s College bad Tura Christian College.
Ka University Grants Commission (UGC) ka la ithuh ïa ka jingseng ïa ka Captain Williamson Sangma State University katkum ka kyndon 2(f) jong ka UGC Act, 1956 lyngba ka shithi ba la pynmih ha ka 6 tarik u Nohprah, 2024.
