Shillong, K’lyngkot 13
U Nongïalam ka National People’s Party (NPP), Rakkam A Sangma, u la ong ba ka Khyrnit Hynriew jong ka Riti Synshar ka dei kaba khlaiñ bor bha na ka bynta ki riewlum, kumta ki paidbah ki dei ban rai kaei kaba bha tam na ka bynta ïalade ha kane ka ilekshon MDC.
“Ngam da tip than ïa ka ilekshon ha kane ka thaiñ (Khasi-Jaiñtia), hynrei ki paidbah ki dei ban rai kaei kaba bha tam na ka bynta jong ki hi”, u la ong.
Kane ka jingkren u Rakkam, ka long haba kylli halor ka jingkam jong kiba bun ki seng saiñpyrthei bad ki kyrtong ba kin ïoh ban ïalam ïa ka Executive Committee bathymmai ha ki district council hadien jong ka ilekshon.
U la ong ba laitnoh ïa ka Khasi Hills Autonomous District Council (KHADC), ka Jaiñtia Hills Autonomous District Council (JHADC) bad ka Garo Hills Autonomous District Council (GHADC), la ïohi ba kine ar ki ïakynduh jingeh bha ha kaba ïadei bad ka jingsiew tulop ïa ki nongtrei.
U la ong ba ki district council ki dang hap ban shaniah beit ha ka Sorkar Jylla bad ka Sorkar Pdeng na ka bynta ka jingpynmih pisa.
“La dei ka NPP, ka VPP, ka UDP lane ka Congress, kine ki seng ki tip bha ba ki paidbah ki tip ka seng kaba kumno kaba lah ban leh bha bad kaba lah ban shakri kham bha ïa ki paidbah”, u la ong.
Haba ïaroh ïa ka jingtreikam jong ka Executive Committee ha KHADC, u Rakkam u la ong ba ka Executive Committee ka la lah ban pynïaid beit ïa ki kam, bad bynrap ba ha ka jingsngew ka jong u, lah ban dang bteng da kane kajuh ka EC, namar ka lah ban pynïadei bad ka Sorkar Jylla kumjuh bad ka Sorkar Pdeng, bad ka lah ban wanrah ïa ki mang pisa ban treikam.
“Ban synshar ha ki district council, kin hap ban ïakynduh jingeh, khamtam namar ba ki hap ban pynmih pisa ban wanrah pisa. Nga tharai ki paidbah kane ka thaiñ ki tip kham bha mano ba lah ban shakri kham bha ïa ki”, la ong u Nongïalam ka NPP uba dei u Myntri ha ka Sorkar.
Ka ilekshon sha ki ar tylli Autonomous District Council (KHADC & JHADC), la buh ban pynlong ha ka 21 tarik u Rymphang ban wan bad ka jingñiew ‘vote’ kan long ha ka 24 tarik jong ujuh u bnai.
