Shillong, K’lyngkot 13
U Bah Lambor Malngiang, MDC ba mynta bad MLA barim ka Nongkrem Konstitwensi u la kob ïa u Bah Ardent Miller Basaïawmoit, President ka Voice of the People Party bad MLA ba mynta ka Nongkrem ban ïatai nia para marwei kata mano napdeng jong ki, kiba la wanrah kham bun ki kam pynroi naduh ki surok bad kiwei pat ha kane ka konstitwensi.
Kane ka jingkob u Bah Lambor ka dei kaba u la pynshong nongrim na ka jingïohi ïa kawei ka video ne durkhih ba la kren da u Bah Ardent ha kawei ka jingïalang ha Rilum Jaiñtia ha kaba u la ong ba u ïohi ïa ka jingleit pynbha surok da u Bah Lambor lyngba kawei ka lad pathai khubor.
U Bah Ardent u la ong ba ki la bun kiba kynthoh ba shano u jah bad ba ki surok ha Nongkrem Konstitwensi ki sniew haduh katta-katta bad bynrap ba bun ki kynnoh ba u la lapmiet leit ïalap ilekshon bad klet ïa ka konstitwensi.
Shuh shuh, u Bah Ardent u la ong ba u khlem klet ïa ka konstitwensi bad ki paidbah ki dei ban wad jingtip balei ki surok ki sniew ha Nongkrem bad bynrap ba ha ki 10 snem ba u long MLA kata na u 2008 haduh 2018 u la wanrah shibun tylli ki surok.
Da kaba jer kyrteng ïa ki surok bapher-bapher kiba u la kam ba u la pynïoh, u la ong ba ha ki san snem ba u khlem shah jied kum u MLA kata naduh u 2018 haduh u 2023 pat ym don kano-kano ka jingsumar ïa ki surok bad kumta ki sniew lut.
U la kynnoh ba kane ka Sorkar ba mynta ka khanglad ïa ki kam pynroi bad kdew ba wat haba u ïalam ïa ki engineer ban peit ïa ki surok ban kyntu ïa ki ban maramot, pynban kim leh eiei namar ki engineer ki hap ha ka jingpeit u Myntri bad kim nud ban leh eiei khlem ka jingbthah u Myntri ka tnat PWD.
U Bah Ardent u la kynnoh ruh ba u Bah Prestone Tynsong, Symbud Myntri Rangbah ba dei peit ïa ka tnat PWD (Roads ) u la kren ba ïa ki jingïarap yn ai tang sha kiba don ha ka Sorkar bad pyntyrkhong ïa kiba don ha ka Liang Pyrshah khamtam kiba dei na ka Voice of the People Party.
U la ong ba lada ki engineer ki tip ba ki surok ki sniew bad kim leh eiei la dei ban pyndam noh ïa ka tnat PWD (Roads) bad ai kin trei lyngba ka Secretariat katba mon u Myntri ba dei peit.
Da kaba pynpaw ba ki nongkyrshan VPP kin shah shitom namar ym dei tang ha Nongkrem ba sniew surok, u la ong ba lada ka Sorkar kam mon un lah leh aïu ma u.
Haba jubab halor kine ki jingkren u Bah Ardent kiba u la kren ha ka janmiet 10 tarik u Kyllalyngkot 2025, na ka liang u Bah Lambor haba kren sha ki lad pathai khubor ha ka nohphai sngi ka 13 tarik u Kyllalyngkot, 2025, u la ong ba kam long kaba ïahap ban phah wad ha ki paidbah.
U la ong ba ka jingkam u MLA ba mynta ka Nongkrem ba u la wanrah ïa ki surok ha ki jaka bapher-bapher ha ki 10 snem bad ha ki san snem pat ym don jingmaramot ka long ka bym ïahap, namar ha ki 10 snem ba long MLA u Bah Ardent ka rukom shna surok ka long kaba torti ka jingstang ka rong ba siang ka long kum i sla rynsun.
Da kaba kdew ba tang hapoh shi snem baroh ki surok ki la khoh lut, u la ong ba kum u MLA ha ki san snem ba la dep kata naduh u 2018 haduh u 2023 u la hap ban pyntrei biang ïa ka surok na Liewlong sha Rngishillong ka ban poi sha Upper Shillong.
U la ong ba ma u hi ha ka por ba long MLA u la wanrah ïa ka surok Laitkor-Pomlakrai- Laitlyngkot, ka surok na Lad Smit sha Smit ter ter, ka surok na Lad Nongkrem- Nongkrem-Umphrup-Smit bad kiwei-kiwei pat.
U la ong ba u paidbah u wad ba u ïohi ïa ka jingsniew ka surok bad ka jingïoh ïa ki skhim surok ha ka por jong u ka dei namar ba u leit ban wad hi da ka met.
U la ong ba wan da kaba ïakob tai nia bad u Bah Ardent ban ïakren halor ki kam kyntiew ïa ka roi ka par ha Nongkrem Konstitwensi mano ba la ai kham bun bad hap ïa sei jingpynshisha ruh da ki kot ki sla.
Da kaba pynpaw ba ka jingkam u Bah Ardent ba um don ha ka Sorkar hi ka dei ka jingbym lah ban treikam, u Bah Lambor u la ong ba ki aplikeshon na kiwei ki MLA ka VPP ki poi sha kamra u Myntri Rangbah katba na Nongkrem Konstitwensi pat ym don eiei.
U la ong ba ki paidbah ki jied ba ki ai ka jingkitkhlieh ha u Bah Ardent ba un wanrah ka roi ka par bad jingkylla ha ka thaiñ hynrei mynta ban ñiat da u paidbah te shano kan ïahap bad ka dei ïa u nongmihkhmat ba un leit wad na ka Sorkar bad ki bor ba dei khmih.
U la ong ba ka jingangnud jong u ka long hi ba un pynurlong ïa ka surok na Laitkor sha Malki khnang ban ïarap pynduna ïa ka dheng kali ha nongbah Shillong.
