Nongstoiñ, K’lyngkot 13
Ka shlem u District Election Officer jong ka West Khasi Hills District, ha ka Lah Sngi U Blei ka la pynmih ïa ka Draft Electoral Roll na ka bynta ka ilekshon KHADC 2025.
Kane ka thup kyrteng ka kynthup ïa baroh lai tylli ki konstitwensi jong ka district kaba kynthup ïa ka 27-Nongstoiñ DCC, 28 Rambrai Jyrngam DCC bad 29 Mawshynrut DCC.
Ïa kane ka jingïalang la pynlong ha kamra jingïalang ka shlem u DC hapoh ka jingpynïaid jong u Bah Garod LSN Dykes, IAS, ha ka jingdonlang ryngkat kiwei pat ki ophisar ka district kiba kynthup ïa u Bah VC Swer, MCS (ADC & RO), u Bah E Lyngdoh MCS (AC & ARO), u Bah CP Mawkhon, MCS (ADC), Bah R Kharkongor MCS (AC, BDO) Mawshynrut, Bah T Diengngan, BDO, Nongstoiñ, Kong R Kharshandi (AERO) Rambrai, u Bah R Kharmujai ASE bad ki nongmihkhmat jong ki seng saiñpyrthei bapher-bapher.
U DEO u la aiti paidbah ïa ka thup kyrteng nongthep vote sha ki nongmihkhmat jong ki seng saiñpyrthei.
Katkum katei ka thup kyrteng baroh ki nongthep vote kiba lah ban thep vote ki long 131,787 ngut, ryngkat ka jingkheiñ bniah katkum ki konstitwensi, 27-Nongstoiñ DCC ki long 45,961 ngut, 28-Rambrai Jyrngam DCC ki long 42,058 ngut bad 29-Mawshynrut DCC ki long 43,768 ngut.
Ka District ka don haduh 146 tylli ki jaka thep vote, ha kaba 29 tylli la ithuh ba ki long kiba lah ban shah ktah namar ki daw kum ka jingïakhun ha ka saiñ hima-sima, ki jingïakhih hapdeng ki jylla, bad ka jingjngai jong ki jaka.
Shuh shuh na ka liang jong u DEO u la ong ruh ba ka tarik khatduh na ka bynta ki jingdawa bad jingpyrshah kan long ha ka 22 tarik u Kyllalyngkot 2025, ka jingpynkut ïa ki jingdawa bad jingpyrshah kan long ha ka 24 tarik u Kyllalyngkot 2025, ka jingpynmih ïa ka thup nongthep vote ba khatduh ka dei ha ka 27 tarik u Kyllalyngkot 2025.
Na ka liang u District Election Officer (DEO) u la kyntu ïa baroh kiba don bynta bad ki nongthep vote ba kin bishar bniah ïa ki kyrteng jong ki bad pynthikna ba baroh kin ïoh ban kynthup ha kane ka thup jingthoh ne ka draft electoral roll.
