Shah tuh ka arshaka na Laban, lap ba ka la poi sha Tripura

Ha kaba ïadei bad kine ki jingjia, ki pulit ki dang pynlong ka jingtohkit ban lapdien bad kumjuh ban kem ïa ki briew kiba donkti ha kine ki kam tuh.

Shillong, K’lyngkot 13

Kawei ka arshaka kaba la shah tuh dang shen na ka thaiñ Laban, la lap pat mynta ba ka la don sha kawei na ki jaka ha ka jylla Tripura.

Katkum ka khubor ba la ïoh na ki pulit la ong ba u Gorind Prasad u la ai ka jingujor ba ha ka 9 tarik mynta u bnai, ki runar bym lah ban ithuh ki la tuh ïa ka arshaka jong u kaba don ïa u registration number ML05-AD-1010 na ka thaiñ New Kench’s Trace, Laban, Shillong.                     

Shuh shuh la pyntip pat ba ha ka 10 tarik mynta u bnai, ïa kane ka arshaka kaba la shah tuh la lah ban tip bad lapdien ba ka la don ha ka shnong Saparijala ha Tripura lyngba ka kor GPS kaba la pyndait ha kane ka arshaka.

Ha kawei pat ka khubor u Vicky Lynshing u la ujor sha ki pulit ba hapdeng ka 9 bad 10 tarik mynta u bnai, ki runar bym lah ban ithuh, ki la tuh ïa ka arshaka ka jong u kaba don ïa u registration number ML05-AE-2088 na ka phyllaw ïing sah ka jong u, kaba don ha Laitkor, Shillong.

Kumjuh, na ka liang jong u Richard Japang u la ai ka jingujor ba ha ka miet jong ka 10 tarik mynta u bnai, ki runar bym lah ban ithuh ki la tuh ïa ka arshaka jong u kaba don ïa u registration number AS01-1182 na ka thaiñ Ïewduh, Shillong.

Ha kaba ïadei bad kine ki jingjia, ki pulit ki dang pynlong ka jingtohkit ban lapdien bad kumjuh ban kem ïa ki briew kiba donkti ha kine ki kam tuh.