Shillong, K’lyngkot 14
U Bah Seibor L Nonglait, kyrtong ban ïakhun ïa ka ilekshon MDC kum u kyrtong shimet u la pynpaw ba u la mih shakhmat ban ïalap ïa ka ilekshon da ka jingieit bad ban wanrah ïa ka jingïatylli para Khasi ym da ka jingkdew kti.
U Bah Seibor, uba dei u President barim bad nongïalam ba nyngkong ka TULBA, u la pynpaw ba dei ma u uba nyngkong tam ha Meghalaya ban pynbna ban ïakhun MDC na Mawlai konstitwensi naduh 16 tarik u Jymmang 2023.
U la ong ruh ba u kwah ka shap da u dohnud. Ka jingthrang jong u ban long u nongshakri paidbah ka dei naduh ka por ba u dang dap 18 snem ka rta. Kumta u la ap ïa kane lad ka kabu ban ïakhun ïa kane ka ilekshon haduh 27 snem.
U la ong ba ka jingthmu jong u ka long ban ïoh shakri hok met bad mynsiem ïa u paidbah Mawlai bad ïa ka bri hynñiewtrep hynñiewskum.
U la rai naduh ba sdang un ym ïakhun na kano-kano ka seng namar u don la ka jong ka nongrim. U la pynpaw ba dei ma u ba la rung nyngkong eh sha ki shnong ki thaw jong baroh kawei ka shnong Mawlai bad ong ba ka jingthmu ban leit sha ka Khasi Hills Autonomous District Council ka dei ban leit ban pynbha ïa ki aiñ ba la don lypa.
Shuh shuh, u la pynpaw ba dei ban pynneh pynsah ïa ki lai tylli ki maw byrsiew jong ka jaidbynriew, nyngkong ïa ki riti ki dustur, ka ri kaba ju bna ka ri kaba shong suk shong saiñ, ka ri jong ka burom ka akor, ba ar ban ïada ïa ka khyndew ka shyiap, ki khlaw ki btap bad ba lai ban teh lakam ïa ka khaïi ka pateng, ka ïew duh kaba ju dei ka pliang jong u trai ri trai muluk.
U Bah Seibor u pynpaw ba un dawa bad ïakhun ba ka Sorkar Pdeng kan ithuh ïa ka ktien Khasi ha ka khyrnit ba phra bad ka jingdawa Inner Line Permit, Bengal Eastern Frontier Regulation Act of 1873, ka jingweng noh ka paragraph 12A (a) na ka Sixth Schedule namar ka jingbsut ïa ka Paragraph 12A (a) ha ka Sixth Schedule ha u snem 1971 ka nang pyntlot bor shuh shuh ïa ki ADC.
