Jowai, K’lyngkot 14
U MP barim jong ka Shillong bad u President jong ka Meghalaya Pradesh Congress Com-mittee (MPCC), Bah Vincent H Pala, u la kynthoh ba ka rukom treikam jong ka Voice of the People Party (VPP) ka ïasyriem bad ka Bharatiya Janata Party (BJP), namar kine ar tylli ki seng ki ïalap bad ïakhun ilekshon halor ka mat Reservation ne jingai bhah kyrpang bad ha ka jingngeit niam.
U la ong shuh shuh ba “Haba phi leit shong bad sngap ïa ki jingkren ki nongïalam ka VPP ha ki jingïalang jong ki, phin sngew kumba phi shong ha ka jingïaseng ym kum ka jingïalang saiñ hima-sima.”
Ha ka jylla Meghalaya ki bun bha ki jait niam kum ki Hindu, Khristan, Muslim bad ki jingngeit tynrai kum ka Niamtre bad niam Khasi, kumta ym dei ban pynïakhleh ïa ka niam bad ka saiñ hima-sima, ong u Bah Pala haba ïakren bad ki lad pathai khubor hadien ba la wai ka jingïalang ba la pynlong ha CTC Orchid Inn Thadlaskeiñ ha ka Sngi Ba-ar ban pynithuh ïa ki kyrtong jong ka Congress ban ïakhun ïa ka ilekshon MDC.
Shuh shuh, u la ong ba ki briew kiba pyndonkam ïa ka niam ha ka saiñ hima-sima ki long kiba ma bha bad u la ai nuksa kum ka Pakistan, kum ki Hamas, kum ki Syria bad kiwei de ki jop hynrei ka jingjop jong ki kam ju neh slem.
Haba phai sha ka ilekshon MDC, u President ka MPCC u la ong ba ka seng ka la pynïeng kumba 17 ngut ki kyrtong na JHADC. Kumta na ka liang jong u, u khmih lynti ba ka seng kan jop bun ngut namar ba ki briew ki la ngiah ïa ka Sorkar namar ym ju don briew ha ka District Council namar ba kim ïoh tulop bad ïa ki kot ki sla la shu leh bad shna hi namar bym don nongtrei.
U la ong ba ki briew ki la sngewthuh ba dei tang ka Congress kaba lah ban ai ka jingsynshar kaba bha namar ki seng rit ki lapmiet tang ban shu ai ki jingkular ba heh ba heh.
