Shillong, K’lyngkot 14
Ka Committee u Justice (retired) BP Katakey ba la thung da ka Kashari Meghalaya High Court ban bishar ïa ki jingtih dewïong beaiñ hapoh ka Jylla Meghalaya, ka la pynpaw ba dei ban shim kam pyrshah ïa u Deputy Commissioner jong ka Dima Hasao district, Assam halor ka jingshah tep im ki nongbylla tih dewïong ha kawei ka krem ha Umrangso ha ka 6 tarik mynta u bnai.
Katkum ka jingong u Katakey ha kaba ïadei bad ki kam tih dewïong beaiñ, ka Sorkar ka dei ban pynkitkhlieh beit ha u Deputy Commissioner.
Ka jingwad ïa ki nongbylla tih dewïong ha Umrangso ka la poi sha ka sngi kaba phra ha ka Lah Sngi U Blei, ban lap sa ïa 5 ngut ki nongbylla kiba la shah tep im ha katei ka krem na ka jingshlei um.
Ki kynhun naduh ki shipai ryngkew bad ki shipai duriaw, ki NDRF, SDRF bad ka Coal India Limited, ki dang bteng ban tan ïa ka um napoh katei ka krem.
Kat haduh mynta, tang 4 tylli ki met jong ki nongbylla la ïoh sei na katei ka krem, ba kynthup kawei kaba la sei ha ka 8 tarik bad 3 tylli pat la ïoh ban sei ha ka 11 tarik mynta u bnai.
Halor kane ka jingjia ki pulit Assam ki la kem noh ïa ar ngut ki briew ha ka taïew ba la dep, ba kynthup ïa u Hanan Laskar uba dei u manager jong katei ka krem dewïong thliew khnai bad uwei pat u dei u Punish Nunisa uba la shah kem kham hashwa.
Lah ban kdew ba ha 6 tarik mynta u bnai la ïoh khubor ba ym duna ïa 13 ngut ki nongtih dewïong ba la suba ba ki la sahkut bad shah taplup ha kawei ka par dewïong, hynrei ki tyllong khubor na Assam ki ïathuh ba ki don 9 ngut ki briew kiba la sahkut ha katei ka krem dewïong thliew khnai, bad napdeng kine 4 ngut la ïoh ban sei, katba ka jingpyrshang ban sei ïa 5 ngut kiwei pat ka dang ïaid haduh mynta.
Katkum ka khubor ba la ïoh la ong ba ka jingshah tep ki nongbylla ha katei ka par dewïong ka dei namar ba katei ka krem ka duna ïa ki jingdonkam ba kongsan bad ha ki dur khih ba la ïasam bad ki bor Sorkar ki pynskhem ïa kine ki jingkynnoh.
