Nongstoiñ, K’lyngkot 14
U District Magistrate ka West Khasi Hills District, Bah Garod LSN U Dykes, IAS, u la pynmih ïa ka hukum katkum ka kyndon 163 jong ka BNSS 2023 bad ka kyndon 223 jong ka aiñ BNS 2023 hadien ki jingpeit bniah na ka kaiphod jurip jong ka Meghalaya State Pollution Control Board (MSPCB), ha ka 22 tarik u Naiwieng 2024, kaba pynpaw ïa ki jingma ka ban mih na ka jingjaboh jong ka wah Nonbah bad wah Nondeiñ lyngba ka jingpyntuid jaboh na ki dukan bad kiwei kiwei sha kitei ki wah.
Katkum ka kyrwoh khubor na u District Magistrate u la ong ba kane ka hukum ka khang pyrshah ban bret ïa ki jaboh jabaiñ sha kine ki wah. Kino-kino kiba pynkheiñ kin shah pynngat ha ki kyndon aiñ kiba kynthup ïa ka kyndon 223 BNS ACT 2023 kumjuh katkum ka Meghalaya State Pollution Control Board (Prevention and Control of Pollution) Act 1974 bad ka Air (Prevention and Control of Pollution) Act 1981.
Shuh shuh, u la ong ruh ba la pynmih kyrkieh ïa kane ka hukum da ka jingthmu ban ïada ïa ka jinglong ka um, ki jingthaw ba im ha um, bad ka koit ka khiah jong ki paidbah.
U District Magistrate u la ong ruh ba kino-kino ki bym sngew ïahap ne ïatyngkhuh bad kane ka hukum, ki lah ban wan mih sha ki bor ba dei peit.
