Shillong, K’lyngkot 14
Ka Federation of Khasi Jaiñtia & Garo People (FKJGP), Sengkmie, ha ka Sngi Ba-ar ka la leit ban ïakynduh ïa ki bor pynïaid ka Civil Hospital, Shillong ban pynsngew halor kiba bun ki jingduna jong kane ka jaka sumar khamtam halor ka jingbym treikam shuh jong ka kor MRI mynta la 6 snem kynthih.
“Ngi la wan ban ïakynduh ïa ki bor pynïaid ka Civil Hospital hadien ka jingujor na ki paidbah babun-balang kiba la wan pynsngew sha ka seng ba ka don ka jingduna ha ka liang ka jingsumar ha kane ka jaka,” ong u President ka FKJGP, Bah Dundee C. Khongsit hadien ka jingïakynduh bad ka Additional Director of Health Services, kaba dei ruh ka Medical Superintendent (MS) ka Civil Hospital, Shillong, Dr. A. Kharjana.
Halor ka kor MRI ka bym shym la treikam shuh ha kane ka jaka sumar naduh u snem 2018, u Bah Khongsit u la ong ba ki bor pynïaid ki la pynshai sha ka seng ba naduh utei u snem (2018), ki la dep ban pyntip sha ka Sorkar, hynrei haduh mynta kim pat lah ban wanrah da kawei.
“Kane ka dei ka jingeh kaba khraw ïa ki paidbah khamtam kito kiba wan na ki longïing ba duna ka ïoh ka kot. Lada kum kine ki kor treikam ba ïadei bad ka kot ka khiah kam don ha sor Shillong (ha Civil Hospital), ngin khmih lynti kumno pat sha ki thaiñ nongkyndong ne kiwei-kiwei ki distrik,” la ong u President.
Haba ïadei bad ka ‘Pathology Test’, une u nongïalam u la ïathuh ba ka MS ka la ong ba kane ka jingpeit bniah ka don ha kane ka jaka sumar hynrei hadien ba la pynkynriah kam noh ïa u ‘Pathologist’ sha Ganesh Das Hospital, haduh mynta, ka Sorkar kam pat shym la thung bujli da kiwei pat.
“Kane ka ‘Test’ kaba kham rem bad ki paidbah ki ïakynduh jingeh lada ki wan ban sumar hangne bad lada kim ïoh ban phah peit bniah,” u la ong.
Ha ka liang ka jingsumar ‘Dialysis’, u Bah Khongsit u la ïathuh ba ki bor pynïaid ki la pynsngew ba ki kor treikam ki don hynrei namar ka jingduna jong ka jaka, na ki 5-6 tylli ki kor kiba la lah ban don, kiba treikam ki long tang 2-3 tylli.
Ka seng ha kane ka sngi kaba la ïakynduh ruh ïa nongpang bad ïakren bad ki bahaïing bahasem jong ki, ka la ong ba ki bahaïing ki la pynpaw ka jingeh ha ka liang ki dawai-dashin naba ki hap ban thied na shabar, kumjuh ki don ruh ki jingpeit bniah (test) kiba ki hap ban leh sha kiwei ki jaka sumar, ha kawei ka liang kaba buh jingeh shi kat dei ïa ki – naba bun ki wan na ki longïing kiba duna ka ïoh ka kot.
“Ka seng ka pynpaw ka jingsngewdiaw namar ka jingsumar ha ka liang ka koit ka khiah ka dei ka hok jong man la u nongshong shnong ka Jylla. Nga ngeit skhem ba ka koit ka khiah ka dei kaba hakhmat eh kaba man la ki longïing ki donkam,” u la ong.
Shuh-shuh, haba kyntu ïa ka Sorkar ban phai khmat nyngkong eh sha ka koit-khiah, u Bah Khongsit u la bynrap, “Ngi phah ka khubor sha ka Sorkar ban shimkhia ïa kine ki jingduna kiba bun kiba ka seng ka la lap ha kane ka jaka sumar.”
