Shillong, K’lyngkot 14
U MDC ba mynta na Sohïong Konstitwensi, Bah Sherbor Mawlong, u la pynpaw ba un kyrshan met bad mynsiem ïa u Bah Samlin Malngiang uba la ïoh ïa ka tiket na ka National People’s Party (NPP) ban ïakhun ïa ka ilekshon MDC na Nongspung-Sohïong Konstitwensi sha ka ïingdorbar ka Khasi Hills Autonomous District Council.
Kane ka jingpynpaw u Bah Sherbor ban kyrshan met bad mynsiem ïa u Bah Samlin ka dei namar ha kine ki sngi la ïoh ka khubor ba ka la don ka jingïapher jingmut hapdeng ki nongkitkam ka NPP ha Sohïong Konstitwensi hadien ba u la shah pynduh tiket ïa ka ilekshon MDC. U Bah Sherbor u la pynshai ba ka jingïoh tiket u Bah Samlin ha kane ka ilekshon MDC na ka NPP ka dei ka jingïasngewthuh jingmut lang.
Katba u Bah Samlin Malngiang u la pynpaw ba ka jingmih ka jong u ban ïakhun ïa kane ka ilekshon MDC ka dei hadien ka jingïasngewthuh jingmut bad u MDC ba mynta (Bah Sherborlang) bad ki nongkyrshan.
U la pynpaw ba ka jingmih jong u sha kane ka ilekshon MDC ka dei namar u don ka jingthrang ka mynsiem ban ai jingshakri ïa ka konstitwensi bad ïa ka jaidbynriew.
“Kum u nongïalam ha ka jingïaid lynti ki don shibun ki jingduna hynrei da ka jingshah rem ka long ruh ka jinghikai ïa nga ba ngan dang pynbha bad pynbeit ïalade,” u la ong.
U la pynkynmaw ba ha ka por ba u long MDC u la lah ban pynbeit ïa ka rukom synshar tnum ïing sha ka jingsynshar shnong da kaba pynbeit ïa u pud u sam.
U Bah Samlin u la ïathuh ba ka jingshah rem jong u ha ka ilekshon MLA 2023 ka dei namar ki paidbah ki dang sngewlem ïa ka jingkhlad noh u Bah HDR Lyngdoh.
Shuh shuh, u la ong ba ha kane ka jingïakhun ïa ka ilekshon um ju shim ïa ki kyrtong kiba tlot hynrei baroh ki dei kiba khlaiñ suda bad kumta donkam ban trei shitom bad ïeng skhem halor ka nongrim lajong.
