Nongstoiñ, K’lyngkot 15
U President ka Voice of the People Party (VPP), Bah Ardent M Basaiawmoit, u la ong ba ka jingweng jong ka VPP ïa ka rai ban ai tiket ïa u Bah Marbiang Nongsiej kum u kyrtong MDC ka seng na Nongstoiñ kam dei ba ka don kano-kano ka daw shimet hynrei ka dei namar ka shrip kaba ap ïa ka VPP.
U Bah Ardent u la ong ruh ba kaei kaba jia hadien ba la ai tiket, bluit ka mih kawei ka dur-khih (video) kaba la sdang ban saphriang ha ki rynsan ‘social media’ ha kaba u Bah Marbiang lem bad uwei u paralok jong u ki ai jingkren ban pynpaw ïa ka jingsngewnguh ïa u Conrad Sangma u Myntri Rangbah ka Jylla namar ka jingïoh ïa ka ‘mining lease’ bad kane ka dur-khih ka dei naduh u snem 2021. Kane ka la pynlong ïa ki nongïalam ba kin hap pyrkhat ha kaba kane ka lah ban ktah bad pynap shrip ïa ka seng.
U Bah Ardent u la kren bad pynpaw ïa kane sha ki paidbah ka Nongstoiñ ha ka jingïalang pynithuh ïa u kyrtong ka VPP u ban ïakhun na Nongstoiñ u Dr. Juristman Iawphniaw kaba la long ha ka 15 tarik mynta u bnai hakhmat ïew Nongstoiñ.
U Bah Ardent haba pynshai ïa kane ka bynta u la ong, haba kren ïa ka Nongstoiñ, ka VPP ka don ïa ka jingkhohñioh mynsiem ban ai tiket ïa u Bah Marbiang, namar ka la mih ka jingïakren sharum-shaneng ban ong ba u Bah Marbiang u ïa don bynta ha kita ki kam khaïi dewïong lane kita ki high level.
Shuh shuh, u Bah Ardent u la ong ruh “Ngi la ïohsngew ïa kata hynrei une u samla u ba wan ban ïakynduh ïa ngi u pynpaw ba em, u don ka jingthrang ba shisha bad um wan tang ban ïoh tiket ban ïakhun ilekshon. Te kum ki nongïalam jong ka seng ka la don kata ka jingïakren hapoh jong ngi, ki la don kiba pynsngew wat kiba don ha syndah bad ngi hapoh Nongstoiñ ba ki la thut ba ngi la rai ïa u Bah Marbiang hynrei, balei ngi rai nyngkong ïa u Bah Marbiang? Ngi rai namar, hooid ka don kata ka jingïakren kata ka jingkynnoh hynrei kam lah long ba ngin shu ngeit ïa kata ka jingkynnoh, ka jingpynsngew jong ki briew ngi peit ïa u ngi sngew ban ailad ïa u ba un long u kyrtong bad kumno u long ynda u la ïatrei bad ka VPP, kata ka dei ka jingjynsur mynsiem ka jong ngi ba ngi kwah wat hapdeng kita ki jingsngew khohñioh bad ki jingkynnoh”.
Ha katei ka jingïalang, nalor u Bah Ardent la donlang ruh kiwei ki nongïalam jong ka VPP, u Secretary ka State Election Committee ka VPP, Dr. Londoner M Sohtun ba la shim ruh ïa ka bynta ha kane ka sngi ban pynithuh sha ki paidbah ïa u kyrtong jong ka seng ba ka la dep ban pynbna kata u Dr. Juristman Iawphniaw.
