Shillong, K’lyngkot 15
Ka Synjuk Ki Rangbah Kur Ka Bri U Hynñiewtrep ka khot bad wer ïa baroh ki paidbah ka jaidbynriew ba kin mih shakhmat bad ban ïashimbynta ha ka Dorbar Iktiar Paidbah ba la khot da ka Khasi Hills Autonomous District Council (KHADC) ha ka 18 tarik u Kyllalyngkot ka ban long ha Madan Polo, 2nd Ground ha ka por 10:30 mynstep.
Haba kren sha ki lad pathai khubor ha Shillong Press Club ha ka Sngi Balang, u Working President ka Synjuk Ki Rangbah Kur Ka Bri U Hynñiewtrep, Bah Erwin K Syiem Sutnga, u la ong ba kane ka Dorbar Iktiar Paidbah kan pynkupbor ïa ki paidbah lyngba ki aiñ jong ka District Council kaba kynthup ïa ka Khasi Hills Autonomous District Administration of Elaka Amendment Act, 2023 bad ruh ka Khasi Hills Autonomous District Khasi Social Custom of Lineage Amendment Act, 2023.
U la ong ba ka aiñ Khasi Hills Autonomous District Administration of Elaka Amendment Act, 2023 ka pynkupbor ïa ki Rangbah Dong, ki Seng Kynthei, ki Seng Samla bad ka Khasi Hills Autonomous District Khasi Social Custom of Lineage Amendment Act, 2023 ka pynkupbor ïa ki Rangbah Shnong.
“Kane ka dei ka sien kaba nyngkong ha ka histori jong ka KHADC lane kino-kino ki Council kiba don hangne la ka long ha ka JHADC ne GHADC kaba kane ka stieh kaba la buh da ka Riti Synshar ka Ri India ba ki la thaw ïa kine ki aiñ bad bsut ïa ki kyndon jong kine ki aiñ ban kren shai kdar ïa ka bor jong ki shnong, ka bor jong ki Seng Longkmie bad ïa ki Seng Samla bad khamtam eh ïa ki Rangbah Kur”, ong u Bah Erwin.
U Bah Erwin u khot bad wer ïa baroh ki paidbah nongshong-shnong jong ka Bri u Hynñiewtrep naduh ki Seng Samla Shnong, ki Seng Kynthei, ki Seng Longkmie bad kumjuh ruh ki Seng Kur bad ki Dorbar Shnong ba kin ïa mih ryntih ban wan ha katei ka sngi namar kane ka Dorbar kam dei satia kata ka jingïakynduh saiñ pyrthei ne ban ïakren ïa ki kam saiñ pyrthei hynrei ka dei ka Dorbar ban ïakren ïa ka politik jong ka jaidbynriew.
Na ka liang u Bah R.L Blah, Secretary Synjuk Ki Nongsynshar Shnong Ka Bri U Hynñiewtrep, u la pynpaw ka jingsngewnguh kaba khraw eh ïa ka District Council ba ka dei hadien ka 72 snem ba la lah ban pyntreikam ïa kine ar tylli ki aiñ.
U Bah Blah u la ong baroh shikatta hapoh ki Dorbar Shnong la ithuh tang ïa ka bor jong ki Rangbah Shnong hynrei ha kane ka kynti kaba mynta pat ba lyngba kine ki ar tylli ki aiñ, yn ithuh noh sa ïa ka bor jong ki Rangbah Dong bad khamtam eh ïa ka bor jong ki Seng Longkmie bad ki Seng Samla hapoh ka shatri jong ka Dorbar Shnong.
