Jowai, K’lyngkot 15
Ka Dorbar ki Waheh Kur Ri Jaiñtia ka la la leit ban pynkynmaw ïa u CEM jong ka JHADC u Bah Thombor Shiwat ïa ka jingkyrpad jong ka dorbar ban pynmih noh ïa ka jingthoh ne ka Executive Order ban ithuh ïa baroh ki Kur, ki nongkitkam ne ki Waheh jong ki Sengkur, Dorbar Kur hapoh u pud jong ka JHADC.
Ha kane ka jingleit ïakynduh la ïalam da u President Ma Khroo L Pariat, Vice President Ma Pyrkhat Shylla ryngkat ka jingsynran lang ki longkmie ha ka 15 tarik Kyllalyngkot.
Na ka liang ka Dorbar ki Waheh Kur Ri Jaiñtia ka la ai por haduh 25 tarik Kyllalyngkot 2025 ïa ka JHADC ban pynmih jingthoh halor kane ka jingkyrpad jong ka Dorbar.
U Ma Khroo L Pariat haba kren sha ki lad pathai khubor u la pynpaw ka jingsngewdiaw halor ka jingsngap mynthi bad ka jingbym burom ka Executive Committee ka JHADC halor ka jingkyrpad jong ka dorbar kaba ka la dep aiti lyngba ki jingthoh na ka por sha ka por naduh u snem 2022 haduh 2024.
U la ong ba ka jingkyrpad jong ka dorbar ka long ban tehsong ïa ka jaidbynriew kaba shim ïa ka kur bad seng jait na ka kmie khamtam ha kine ki sngi ba ka hok longbriew-manbriew ka la shah tynjuh na baroh ki liang.
Nalorkata, u la ong ruh ba ka dorbar ka la kyrpad ïa ka JHADC ban pynmih hukum sha baroh ki Waheh shnong, ki Dolloi hapoh u pud u sam jong ka JHADC ban ym ai syrnot ïa kino-kino ki bar jylla na ki jaidbynriew riewlum ne ki bar Jylla ki bym dei trai ri na kane ka jylla Meghalaya bad Ri India.
U la ong ba ïa kane ka hukum dei ban phah sha u Deputy Commissioner jong ka West Jaiñtia bad East Jaiñtia Hills District na ka bynta ba kin ai ïa ka syrnot Schedule Tribe katkum ka hukum ka JHADC.
Halor kane jingai por jong ka dorbar, na ka liang u CEM u la ong ba kan dang shimpor ban pyndep hynrei na ka liang ka council ka la dep ban ïakren hapoh ka EC ban ai da ka jingthoh sha baroh ki Waheh shnong ban long kiba phikir haba ai NOC ban ïaleh Schedule Tribe khamtam ïa ki jaidbynriew bym dei ki trai ri trai muluk.
