Khliehriat, K’lyngkot 15
Haduh lai ngut ki briew ba kynthup ïa ar ngut ki kynthei ki la duh noh la ka jingim katba kawei ka la mynsaw jur hadien ba kawei ka Tata Sumo kaba wan na Guwahati ka la hap sha kawei ka riat kaba jrong kumba palat 200 phut ha ki bynta jong ka Ratachera ha East Jaiñtia Hills.
Katkum ki khubor ba la ïoh lum la ïathuh ba kane ka Tata Sumo ka dei kaba wan na Guwahati da ka jingthmu ban leit sha Aizawl ha ryngkat lai ngut ki nongleit jingleit kiba dei ki kynthei.
Hynrei, hadien ba la poi ha ki bynta jong ka Ratachera, kane ka kali ka la kylla khongpong bad poi sha ka liang bym dei jong ka surok bah ha shwa ba kan hap sha kane ka jaka riat ba jylliew.
La ïathuh ba ha kane ka jingjia, u nongñiah jong kane ka kali ha ryngkat kawei na ki nongleit jingleit ki la khlad noh hashen katba kawei pat ka la khlad noh hadien ba la pynkynriah sha Umkiang PHC, bad kawei pat ka dang don hapdeng ka jingshah sumar na ka jingmynsaw jur.
Kine lai ngut ba la khlad ki dei ba la tip kyrteng kum u Nasim Ahmed Choudhury, 25 snem na Silchar, ka Zothanpari 51 snem na Tithing, Aizawl, Mizoram bad ka Jenny Lalrinthangi, 33 snem na Mamit District, Mizoram.
Ïa ka met ïap jong kine ki briew la ïarap sei da ki shipai pahara khappud (BSF) na ka 172 Bn, BSF Meghalaya.
