Shillong, K’lyngkot 15
U Myntri Rangbah ka Jylla, Conrad K Sangma, u la kyntu biang ïa ka Hynñiewtrep National Liberation Council (HNLC) ban wanphai bad bteng biang ïa ka jingïakren ïasuk khnang ban lah bad pynbeit ïa ki mat ki ban pynneh ïa ka shongsuk shongshngaiñ ha ka jylla.
Hynrei halor ka jingdawa ka HNLC ban map noh ïa ki kam bymman, ka Sorkar ka kren shai ba ka Sorkar Pdeng ka la dep pyni ba kam lah ban leh noh ïa kine namar ba ki don katto-katne ki kam kiba dang ngat ha ki kyndon aiñ kiba la don lypa naduh ki por ba la leit hynrei ka don pat ka lynti ban pynïaid shakhmat ha kaba ïadei bad kane ka mat ka ban sa mih bad kaba lah ban ïakren.
“Hynrei ha shwa ban sdang ka jingïakren, kumno la buh lypa ki kyndon ïa ka Sorkar India ba kan leh ïa katei,” la ong u Myntri Rangbah haba ïakren bad ki lad pathai khubor ha ka Sngi Balang.
U Myntri Rangbah u la khot ïa ka HNLC ban wan ïakren bad u dap da ka jingkmen ban plie lad biang ban pynïaid shakhmat ïa ka jingïakren kumba la pynïaid shakhmat ha ka por ba la dep.
Ha ka jingshisha, ka jingïakren ïasuk bad ka HNLC ha ka wat kaba nyngkong ka la long ha u snem 2023 hynrei kam shym la ïaid shuh shakhmat hadien ba kane ka seng ka la weng noh na ka jingïakren ïasuk.
“Lada ngi kwah shisha ban ïaid shakhmat, ngi hap ban weng ïa kito ki jingeh bad ki jingtynjuh bad kane ka dei tang kata ka lynti kaba lah ban pynbeit ïa ki jingtynjuh da kaba ïakren bad ïatai bad ban wad ïa ki lad ki lynti. Kumta ngi kyntu ban peit ba ki jingtynjuh, ki lah ban don ki bynta bad ki diengpyngkiang kiba lah ban mih, kan dei kaba ju jia ha kino-kino ki jingïakren ne jingïasyllok hynrei katei kam dei ban pynduh mynsiem noh ïa ngi, dei ban pynthikna ba kan pynlong ïa ngi kiba ïengskhem ban ong ba ngi kwah ïa ka jingsuk kaban neh shi rta bad ngi kwah ba ïa kitei ki mat baroh dei ban shimkhia bad haba mih kano-kano ka jingsngewkhia na ka liang ka jong ki, ngi donkam ban ïa shong ban ïa pyrkhat katkum ka rukom treikam jong ka riti synshar ka ri, hapoh ka jingïakren bad ka MHA bad ka sorkar jylla bad ka kynhun ka jong ki ngi dei ban ïaid shaphrang.
“Ka jingkyrpad ka jong ngi ka long ba ngi kwah ban phah biang ïa ka khubor sa shisien ba ngi kloi ban ïakren bad to ngin ïa leit sha ka miej ban ïakren ïa kino kino ki jingsngewkhia kiba ngi don, namar kaba biang tam ban pynbeit ïa ki jingeh ka dei lyngba ka jingïakren” u la bynrap.
