Shillong, K’lyngkot 15
Ka jingpynkhreh ban pynlong ïa ka MDC ilekshon ka la nang ïaid shakhmat bad sdang ban shongshit ha kaba la sakhi ruh ïa ka jingphet bad ka jingmih-jingrung seng jong ki nongïalam ba hakhmat eh jong ki seng saiñ pyrthei bapher-bapher bad ban leit pynïasoh pat sha kiwei ki seng kiba ki sngewmon.
U Bah Gerald Shullai u dei u kyrtong ka Congress ban aireng mynta ha ka ilekshon MDC sha ka Khasi Hills Autonomous District Council (KHADC) na Jaïaw-Mawprem Konstitwensi uba la long teng uwei na ki nongkitkam ba hakhmat eh ka United Democratic Party (UDP) jong ka West Shillong ha ki por kiba la dep hapoh ka jingïalam jong u Bah Paul Lyngdoh kum u MLA ka thaiñ.
Haba kylli kaei ka daw kaba la pynlong ïa u kum u nongkitkam ba hakhmat eh ka seng ban ryngkang noh na ka UDP sha ka Congress ha shwa ka ilekshon MDC, u Bah Gerald u la ong ba ka daw tynrai kaba la pynlong ïa u ba un mih noh na ka UDP bad pynïasoh sha ka Congress kam don satia kano-kano ka daw badno-badno hynrei ka dei ka jingpynsngew jong ki paidbah sha ki tyndong shkor jong u ba u dei ban mih madan noh bad ban ïakhun ïa ka ilekshon MDC na ka Congress namar ba u la dei lypa u briew uba ju mihkhmat ïa ka kam shakri paidbah.
“Ha ka jingshisha ngam dei u briew na ka Congress hynrei nga dei u briew na ka UDP ha kito ki por. Ïa ka kam shakri paidbah patde, nga sngew ba ka shong ha ngi shimet-shimet lada ngi kwah ba ngin mih shakhmat ban shakri ïa ka kam paidbah ym ban ong ban don da ki daw ïano-re-ïano hynrei kane ka dei beit katkum ka jingïatyngkhuh bad ki nongshong-shnong bad ki paidbah ka konstitwensi namar nga sngewthuh ba ki ruh ki donkam ïa nga bad nga long uba la kloi”, ong u Bah Gerald.
U la ong ba ka jingleit pynïasoh jong u bad ban ïakhun na ka Congress ka dei namar ba ka Congress ka dei ka seng kaba don ïa ka nongrim naduh mynshwa wat ha kaba ïadei bad ka Khyrnit ba hynriew ne ka Sixth Schedule bad ka dei lyngba ka Congress ba yn sa ïoh ïa ka Sixth Schedule.
U la ong ruh ba ym tang ba ka Congress ka la pynïoh ïa ka Sixth Schedule ha ki por kiba mynshwa hynrei u la ong ba u kyrmen skhem ruh ba lyngba kane ka seng kan sa ïoh ban pynrung ïa ka ktien Khasi ha ka Khyrnit Baphra ne ka 8th Schedule jong ka riti synshar ka Ri.
Haba kylli, u Bah Gerald u la ong ba ka jingïakhun ïa katei ka ilekshon kan long beit ka jingïakhun bad baroh ki kyrtong ki ban aireng hynrei ka shong sa ha ka jingstad jong ki paidbah ka konstitwensi ba kin peit bad khmih ïa u kyrtong uba biang tam eh na baroh ban jied bad pynjop ïa u kum u MDC ka thaiñ.
Shuh-shuh, u la ong ba hateng-hateng ki paidbah ki jied ïa ki nongmihkhmat da ka jingshongshit hynrei ynda la dep ka ilekshon pat ki la sdang sa ka jingkhñium bad ka jingud-jingnam.
