Shillong, K’lyngkot 15
U MDC ka Mawkynrew konstitwensi, Bah Martle N Mukhim, u la pynbna ba un ym ïakhun ïa ka ilekshon sha ka Ïingdorbar Khasi Hills Autono-mous District Council (KHADC) mynta u snem namar ka jingban ka jingshitom ha ka met.
U Bah Martle u la pynbna paidbah ïa kane ha ka jingïakynduh lang jong u bad ki nongkitkam bad nongtrei hapoh ka konstitwensi kaba la pynlong ha Ïingdorbar ka shnong Maw-u-Sam ha ka Sngi Balang.
U Bah Martle u la ong ba kam dei ba um kwah ban ïakhun ïa kane ka ilekshon hynrei ka dei ka met ka bym shah ïa u ban mih shakhmat namar ka jingshitom kaba ban ïa u wat haduh kine ki sngi.
Ha kane ka jingïakynduh lang, na ka liang ki dkhot kiba la poi lang ki la pdiang ïa ka rai jong une u MDC hapdeng ka jingbynnud namar khlem poi pyrkhat satia ba um lah ban ïakhun ha kane ka ilekshon MDC.
Kiba bun kiba ai jingkren ki la ai khublei ïa u Bah Martle kum u nongmihkhmat paidbah uba la trei na ka bynta ka jingkiew jingroi ka konstitwensi baroh kawei ha kine ki bun phew snem bad ki la Kitbok-kitrwiang ba un ïoh noh kloi ka jingkoit jingkhiah khnang ba un bteng ban shakri ïa ka konstitwensi.
U Bah Martle u dei uwei napdeng ki nongïalam ba la rim bha ha ka saiñ pyrthei ha kane ka Jylla.
U la long u MLA ka Dienglieng konstitwensi naduh u snem 1988 haduh 2008 hadien ba u la rem noh ha ka ilekshon MLA ha u snem 2008.
Une u nongïalam u la long ruh u Myntri Sorkar bad u peit ïa bun tylli ki tnat treikam ha ki phew snem ba la leit.
U Bah Martle um shym la lah shuh ban jop ha ki ilekshon MLA ha u snem 2008, 2013, 2018 bad 2023.
Ha ki ilekshon MDC ruh, u Bah Martle u la rem ha u snem 2009, 2014 bad u la jop biang ha u snem 2019 kum u kyrtong ka HSPDP.
U Bah Martle u la long ruh u Executive Member ha ka por jong ka Executive Committee ba la ïalam da ka UDP bad hadien ba la khyllem noh u Bah Titosstarwell Chyne kum u Chief Executive Member, u la don noh ha ka liang pyrshah.
U Bah Martle u la jop ilekshon na bun tylli ki seng kiba kynthup na ka APHLC, PDIC, HPU, UDP, MDP bad HSPDP.
Da ka jingbym ïakhun shuh u Bah Martle ïa ka ilekshon MDC mynta u snem, ka Mawkynrew konstitwensi kan sakhi ïa ka jingmih jong bun ngut ki kyrtong.
