Shillong, K’lyngkot 15
Ka Sorkar Jylla ha ka Sngi Balang ka la rai ban wanrah jingkylla ha ka ‘Meghalaya State Anthem’ da kaba kynthup lang ïa ka ktien Pnar ha ki kyntien jong ka jingrwai.
Haba kren halor kane ka bynta hadien ka jingïalang jong ka Kynhun Myntri, u Myntri Rangbah ka Jylla, Conrad K. Sangma u la ong, “Nga sngewkmen ban pynbna ba ka Kynhun Myntri mynta ka sngi ka la rai ban wanrah jingkylla ha ka ‘Meghalaya State Anthem’ bad ngi sngewkmen ban kynthup katto-katne ki laiñ ha ka ‘Pnar’ ha ka ‘State Anthem’.”
U la ong ruh ba ïa kane yn sa pyllait ha ka ‘Meghalaya Games’, ka ban sa long ha West Jaiñtia Hills bad tem syndon ha kato ka sngi.
