Shillong, K’lyngkot 16
Ka All Jaiñtia Muster Roll Workers & Labour Union (AJMRWLU) ha ka Sngi Palei ka la byrngem ban ïakhih da kaba tyngeh lada ka Sorkar kam pynbeit ïa ki rai bathymmai haba ïadei bad ka ‘Floor Basic Rate’ jong ka ‘Minimum Wage’ hapoh ka Jylla.
Haba pynkynmaw ïa ka jingkular ka Sorkar hadien ka jingïakhih ha u bnai Nohprah jong u snem ba la dep ban dawa pynkiew bad pyntreikam ïa ka ‘Minimum Wages Act’ (ka jingpynkiew ïa ka ‘Floor Basic Rate’) kaba long shisien 5 snem, u nongaibuit ka AJMRWLU, Bah K.L. Pariat u la ong ba ka seng ka la ïoh ka jingthoh na ka Sorkar ha ka 10 tarik Kyllalyngkot lyngba ka Kynhun Myntri kaba la shim ïa ka rai ban pynkiew ïa ka ‘Floor Basic Rate’.
“Haba ïadei bad ka dor ka mur kaba ka Sorkar Jylla lyngba ka Kynhun Myntri ka la mynjur, ka pynkyndit ïa ngi haduh katta-katta naba ka jingpynkiew dor ka long da khongpong. Ki don 4 tylli ki kyrdan nongtrei bylla – ‘Unskilled’, ‘Semi-Skilled’, ‘Skilled’ bad ‘Highly Skilled’. Ha une u snem, ka Sorkar ka la pynkiew tang T.106 ïa ki ‘Unskilled’, T.91 ïa ki ‘Semi-Skilled’, T.75 ïa ki ‘Skilled’ bad T.59 ïa ki ‘Highly Skilled’,” u la ong.
Haba ïanujor bad ka jingpynkiew kaba khatduh, ha ka 1 tarik Risaw, 2018, u Bah Pariat u la ong ba kane ka long mar khongpong naba ha kato ka snem, ka Sorkar ïa ki ‘Unskilled’ ka pynkiew da T.104, ‘Semi-Skilled’ da T.132, ‘Skilled’ da T.160 bad ‘Highly Skilled’ da T.176.
“Ka long da khongpong ba ha u snem 2018, ka Sorkar ka pynkiew na trai shalor – na ki ‘Unskilled’ sha ki ‘Highly Skilled’, hynrei ha une u snem pat nalor ba ka Sorkar la 15 bnai kam shym la pyntreikam katkum ka jingbatai ka ‘Minimum Wages Act’, ka pynkiew na trai …hynrei kiba don sha khlieh ka nang duna shuh-shuh,” u la ong.
Kumta u la ong ba na ka liang ka seng lem bad kiwei pat ki ‘Muster Roll’ kiba don hapoh ka Jylla, kumjuh na Ri-lum Garo, ki la rai ban ym pdiang ne hun halor kane ka jingpyntreikam jong ka Sorkar haba ïadei bad kine ki dor.
“Ka daw ka long ba kumno ba 5 snem mynshuwa, ki marbam ha ïew ki kiew, ka Sorkar ka pynkiew ïa kane ka nong hynrei mynta pat, hadien 5 snem ka pynhiar pat ïa kane ka nong,” ong u Bah Pariat.
U la kdew ruh ba katkum ka ‘Minimum Wages Act’, la kren shai ba hapoh 5 snem, ka Sorkar ka dei ban thaw ïa ka ‘Advisory Committee’ bad ban ai ka kaiphod sha ka Kynhun Myntri ban ïoh ïa ka jingmynjur.
“Ha kine15 bnai kam shym la treikam – ka ban pyntreikam shisha ïa kane ka hukum katkum kane ka aiñ ka long ba kan treikam naduh ka 1 tarik Risaw, 2023. Hynrei ngi kyndit pat ba mynta ha kane ka hukum jong ka Sorkar kaba ka la mynjur, kane kan treikam ha ka 1 tarik Kyllalyngkot, 2025,” u la ong.
“Kumta ka mih ka jingkylli ha ngi baroh, ha kine ki 15 bnai, kan leit shano bad mano ban ïohnong haba ka aiñ ka la kren shai ba ka dei ban treikam naduh ka 1 tarik Risaw, 2023,” ong utei u nongïalam.
Ka seng ha kane ka sngi ka la ïakynduh ïa u Commissioner & Secretary ka tnad ba dei khmih bad ai jingthoh ruh sha u Myntri Rangbah ka Jylla da kaba kdew ba kam pdiang satia ne hun ïa katei ka bynta.
Shuh shuh u Bah Pariat u la bynrap, “U Commissioner & Secretary u la ong ba yn hap ban pynbeit ïa ka tarik-bnai ba dei ban pyntreikam ïa ka hukum…u la ong ba yn sa bishar bad shongpyrkhat halor kane. Ngi ai por 10 sngi ïa ka Sorkar ban pynbeit noh ïa kane – ban pyntreikam naduh ka 1 tarik Risaw, 2023 katkum ka jingkren shai jong ka ‘Minimum Wages Act’ lym kumta ki nongtrei bylla sngi ha baroh ka Jylla kin ïaid shakhmat bad ka jingïakhih ba kham tyngeh.”
