ïakhih bad shong kyllaiñ mungor ka HNYF ban pyrshah halor ka IMA

Shillong, K’lyngkot 16

Ka Hynñiewtrep National Youth Front (HNYF) Sengkmie ha ka 16 tarik Kyllalyngkot, 2025 ka la mih ban pynlong da ka jingïakhih shong kyllaiñ mongor naduh ka por 11 baje mynstep haduh ka por 3 baje janmiet ïa kaba la pynlong ha u Motdur jong u Woh Kiang Nangbah kaba don pyrshah bad ka Shillong Civil Hospital kum ka dak ban pynpaw ïa ka jingpyrshah halor ka jingthmu ban pyntreikam ïa ka Invest Meghalaya Agency (IMA) da ka Sorkar Jylla.

Kum ban shu kdew hangne, ka Kynhun Myntri jong ka Sorkar Jylla ha ka 15 tarik Kyllalyngkot, 2025 ka la shim ïa ka rai ban pynkylla noh ïa ka Section 34 jong ka Investment Meghalaya Agency (IMA) ïa kaba la pynkylla kyrteng sha ka Meghalaya Investment Promotion Authority (MIPA) hadien ba ka la mih ka jingpyrshah kaba jur na ki kynhun bapher-bapher halor kane ka Aiñ namar kan ïatyngkhuh bad ka rukom treikam jong ka Meghalaya Land Transfer Regulation Act, 1971.

Na ka liang ka HNYF ka la pynpaw ba kam shym la hun satia ïa kane ka rai ba la shim da ka kynhun jong ki Myntri ka Sorkar Jylla ha ka Sngi Balang da kaba ka la pynkylla noh ïa kane ka Aiñ Investment Meghalaya Agency (IMA) sha ka Meghalaya Investment Promotion Authority Act (MIPA). Ka seng ka la ong ruh ka jingthmu jong ka Sorkar ka long ban wanrah ïa ka Section 34 hapoh ka Meghalaya State Investment Promotion & Facilitation Act, 2024 kaba don ïa kata ka Land Bank da kaba pynpaw ba kane ka jingthmu kan ïatyngkhuh bad ki Aiñ kiba ïadei bad ka khyndew ka shyiap jong ka Jaitbynriew namar kane ruh kan ïatyngkhuh bad ka Meghalaya Land Transfer Regulation Act, 1971.

Kitei ki nongïakhih ki la rah ruh ïa ki placard kiba thoh- “Ïada ïa ka Ri jong ngi. Ïeng Pyrshah ïa ka Sorkar MDA”, “Ka Ri jong ngi ka dei ka hok aiñ jong ngi”, “Ka jingïatylli pyrshah ïa ka jingbymhok. Ka Jingkiew Pyrshah ïa ka jingïateh kular” bad kumta ter ter.

Haba ai jingkren ha kane ka sngi, na ka liang u President ka Sengkmie, Bah Sadon K. Blah, u la ong ba kam long kaba la biang tang ban pynkylla ïa ka Section 34 hynrei ka Sorkar ka dei ban pynduh-pyndam shisyndon ïa ka jingthmu ban wanrah ïa ka Land Bank.

“Ngim lah ban pdiang ïa kata da lei-lei ruh namar ba ka khyndew ka shyiap hapoh ka Bri u Hynñiewtrep kam dei ka nongkynti jong ka Sorkar bad wat ka District Council ruh ka dei tang ka ‘Custodian’ ne ka jingkhmih-nongsumar ïa ka khyndew-ka shyiap hynrei kam dei ka trai ba kan lah ban leh trai namar ba ka Jaitbynriew jong ngi, ngim pat don ïa kata ka Instrument of Merger bad ka Ri India hynrei haduh kane ka tarik kaba mynta, ngi dang ïasoh bad ka Ri India halor ki kyndon bad kawei ka kyndon ka long ba ka Sorkar kam dei ban tuklar ïa ka khyndew ka shyiap”, ong u Bah Sadon.

U Bah Sadon u la ong ba kane ka jingleh jong ka Sorkar MDA ka dei ka jingthombor ïa ka Jaitbynriew. Ka jingthmu jong kane ka Sorkar ka long ban thaw ïa kata ka Land Bank ka ban lum bad thied lypa ïa ki jaka ka ban ïatyngkhuh pat bad ka Meghalaya Land Transfer Regulation Act, 1971.

“Kawei na ki kyndon kaba kren shai ha kane ka Meghalaya Transfer Act ka ong ba kan ym don kano-kano ka jaka kaba ki trai riewlum kin die lane ban ai nongkynti sha ki barjylla. Ka jingkylli kaba mih ka long ba ka IMA ka dei jong ki riewlum ne jong ki bar jylla bad ka Sorkar ka dei ka riewlum ne bar jylla?”, ong u Bah Sadon.

Ha kane ka sngi la ïoh ruh ïa ki jingkren na kiwei-kiwei ki nongkitkam ba hakhmat ka seng kiba dei na ki distrik bapher-bapher.