Shillong, K’lyngkot 16
U President Rangbahduh ka National People’s Party (NPP) uba dei ruh u Myntri Rangbah ka Jylla, Conrad K Sangma, u la ong ba kum ka imlang-sahlang barabor ka kiar ban pynïakhleh ïa ka saiñ hima-sima bad ka niam.
“Ka imlang-sahlang kan rai, ki paidbah kin rai ngam don eiei ban ong. Ka shong ha kita ki seng saiñpyrthei kaba kumno ka saiñ hima-sima ki leh lane kim leh ka shong ha ki. Hynrei ha kaba kut ki paidbah ki dei kiba jied, ki paidbah ki dei kiba rai bad nga thikna ba ki paidbah kin bishar bniah na baroh ki liang shwa ban jied”, la ong u Conrad.
Haba kylli, u la ong ba ka NPP kam kheiñ sting ïa kino-kino ki seng saiñpyrthei ha ka ilekshon, hynrei baroh kiba hap ban ïakhun tyngeh, namar ki kyrtong ba ïakhun pyrshah lane ki seng ba ïakhun pyrshah ki long kumjuh, bad kam long kaba bha ban kheiñ troiñ ne kheiñ sting ïano-ïano.
“Kum ka seng saiñpyrthei ngin leit sha ka ilekshon da ka jingmut ba baroh kiba ïakhun pyrshah ki dei kiba khlaiñ, bad ngi donkam ban trei shitom”, la ong u Nongïalam ka NPP.
Ha kawei ka liang, u Conrad u la pynpaw ka jingsngewskhem ba ka NPP kan jop ha kane ka ilekshon ban wan na ar tylli ki Autonomous District Council (KHADC & JHADC) ka ban long ha u bnai Rymphang.
Haba kylli shuh shuh, u la Myntri Rangbah u la kubur ba ka jingisih Sorkar ka dei kaei-kaei kaba baroh ki Sorkar kim lah ban kiar.
U la ong ba lada peit ïa ki kam kiba la leh da ka Executive Committee ka NPP ha KHADC, shibun ki aiñ rew (bill) kiba la don, shibun ki mat ba sahteng ki bym shym la leh eiei ha ki por ba la leit noh, la lah ban pyndep da kane ka EC ba mynta.
“Hooid, ki don shibun ki jingtynjuh, shibun ki mat, hynrei kane ka EC ba ïalam da ka NPP ka la leh shibun ki kam bad shibun ki project ba kongsan kum ka jingbei tyngka ïa ki nongwad bniah ba kin lum jingthup shaphang ka kolshor u Khasi, ka ktien ka thylliej bad kiwei-kiwei. Kine ki dei ki kam kiba itynnad ba kumno kane ka EC ka treikam ban ïalam shakhmat ïa ka thaiñ bad ïa ka District Council”, la ong u Conrad.
Ha kaba ïadei bad ka jingpynïaid ïa ka ilekshon, u Myntri Rangbah u la ong ba ki jingpynkhreh hi na ka liang jong ka Sorkar ka long ba kan shim ïa baroh ki sienjam ba dei ban shim ha ka ban pynthikna ba ka jingpynlong ïa ka ilekshon sha ar tylli ki ADC kan long kaba ïaid beit ïaid ryntih.
