Jowai, K’lyngkot 16
Ka Synjuk ki Waheh Shnong Ri-Jaiñtia (SWSRJ) ka la kyntu ïa baroh ki nongïalam shnong bad paidbah nongshong shnong jong ki ar distrik ka Ri-lum Jaiñtia ban pynneh ïa ka shongsuk shongsaiñ hapoh ki shnong ki thaw khamtam ha kum kane ka aïom ilekshon MDC sha ar tylli ki Autonomous District Council (ADC).
U President ka Synjuk, Bah Arminius Lipon u la ong ba mynta ka la poi ka aïom ilekshon ban jied ïa ki nongmihkhmat sha Ïingdorbar thawaiñ jong ka Jaiñtia Hills Autonomous District Council (JHADC), kumta ka Synjuk ka kyntu ïa ki nongïalam shnong ba kin ym don kano-kano ka jingshah liang sha uno-uno ne kano-kano kyrtong.
U la ong ba ha ka por ilekshon ki don ki Waheh Shnong kiba shah ïalam bakla bad la kyntu ba kano-kano ka rai shnong kaba ki shim kan dei na ka bynta ka bha ka miat jong ka shnong ka thaw.
Na ka bynta ka jingïalap ilekshon hapoh ki shnong ki thaw, u Bah Lipon u la pynkynmaw ïa ki Waheh Shnong ka Ri-lum Jaiñtia ban pyntreikam ïa ka rai jong ka Synjuk kaba la dep shim ha u snem 2022, ban shah tang 4 tylli ki kali kynthup jong u kyrtong, bad ruh ym shah ïa kino-kino ki kyrtong ban ïalam bun ngut ïa ki nongkyrshan, namar ka wanrah jingeh ïa u kyrtong ha ka jinglut jingsep, ka jingsahkut kali bad ruh ban pynneh ïa ka jingkhuid jingsuba nalor kiwei-kiwei.
Nalorkata, ka Synjuk ka la kyntu ruh ïa baroh ki nongshong shnong ka Ri-lum Jaiñtia ban burom ïa ki Dorbar Shnong khnang ba ka ilekshon MDC kan long kaba ïaid beit ïaid ryntih khlem kano-kano ka huri-hura.
Shuh shuh ka Synjuk ka la kyntu jur ïa ki kyrtong kumjuh ki seng saiñ hima sima ba haba ki wan ïalap ilekshon hapoh ki shnong ki thaw ban kiar na ka jingkynthoh kynnoh ïa ki Waheh Shnong khlem don ka daw ne sakhi-satar kiba biang namar ka ktah ïa ka kam hapoh ka imlang-sahlang.
