Shillong, K’lyngkot 16
Ka jingthmu jong ka Sorkar Jylla ban ïoh shim jaka na ka tnat Ïada Ri kaba dei jong ki shipai ban pynkynriah ïa kiba sah ha Them Metor ka lah ban jyrwit-jyrwat namar ka jingbym shah ki kyndon.
Ka tyllong khubor ka ïathuh ba ka Sorkar Jylla ka la thaw lad ban ïoh ïa ka jaka shipai kaba don ha syndah ka Them Metor bad ka la ïakren ruh bad ka tnat Ïada Ri ha Delhi.
Hynrei la ong ba ki don ki bynta kiba khanglad namar ki don ki kyndon hapoh ka tnat Ïada Ri kiba khang ban don ki jingtei jingshna hajan jong ka jaka shipai khamtam lada don ka surok paidbah ka bym da jngai na ka jaka shipai.
Ka Sorkar Jylla wat la katta ka dang bteng ban ïakren bad ki bor ba dei khmih ka tnat Ïada Ri kumno ban lah ban pynbeit ïa kane ka jingeh.
Ka Sorkar ka la pyrshang katba lah ban pynbeit ïa ka jingeh khnang ban lah bad ban pynkynriah noh ïa ki briew kiba sah ha Them Metor shawei pat.
Ha ka jingshisha, ka la don ruh ka jingpynkhreh na ka liang ka Sorkar ban pynkynriah sha kawei ka jaka kaba don ha ophis barim ka Shillong Municipal Board.
