Nongstoiñ, K’lyngkot 16
Ka Federation of Khasi Jaiñtia & Garo People (FKJGP) Rambrai Circle hapoh ka jingïalam u Bah Jistarland Lyngkhoi kum President, ha ka Sngi Palei ki la ïoh ban leit jurip ïa ka Rambrai PHC ha kaba ki dkhot jong ka seng ki la lap ïa shibun ki jingduna hapoh katei ka jaka sumar.
Ki katto-katne ki jingduna kiba ka seng ka la lap ki long ba katei ka PHC kam don ïa ka ‘Ambulance’, kam don ruh ïa ki nongtrei kum u ‘Peon’ bad ‘Chowkidar’, nalor kata ruh kam don ïa ka kamra thiah khyllung, ki nongtrei ruh kim da biang bad kiwei-kiwei.
Ki nongkitkam ka FKJGP ki la ong ba ha kaba ïadei bad kane ka bynta, ka seng kan sa shong pyrkhat lang ha ryngkat ka FKJGP, West Khasi Hills District, ban rah sha ka Sorkar ïa kitei ki jingduna jong kane ka jaka ai jingsumar hapoh Rambrai.
Shuh shuh ki la ong ba ka seng ha kajuh ka por ka la sngewdei ban dawa ruh na ka Sorkar ba kan kyntiew kyrdan noh ïa katei ka PHC sha ka CHC namar kat kum ka jingïaid jong ka por ba ki spah tylli ki shnong bad ki phew hajar ngut ki paidbah ba ka PHC ka ai jingshakri.
