Shillong, K’lyngkot 16
U Principal Secretary ka tnad ka koit ka khiah ka Sorkar Jylla, P. Sampath Kumar ha ka Sngi Palei u la ong ba ka tnad ka la ai jinghikai ïa ki doktor halor kumno ban pynkhlaiñ ïa ki jingpeit bniah khamtam hadien ba la lap ïa ka jingpang Human Metapneumovirus (HMPV) dang shen ha Assam.
“Ngi la ai jinghikai ïa ki doktor jong ngi halor kumno ban don shuh ïa ki jingpeit bniah. Kumba ka long, ngi don ïa kito kiba pang ‘Severe Acute Respiratory Infection’ (SARI) bad ‘Influenza-like Illness’ (ILI)…ngi dang khmih bniah ïa ki kumjuh ban phah peit bniah ïa ki nongmuna jong ki ban lap la ki don ne em kum kita ki khñiang HMPV,” ong u Kumar.
Haba kdew ba ki kam ki la ïaid shakhmat, u la ong ba ka don ka rukom treikam kaba biang halor kane bad kum ka tnad, ka dang khmih bniah ïa ka jinglong-jingman haba ïadei bad kane ka liang.
U la ong ruh ba lada lap ïa kane ka jingpang hapoh ka Jylla, yn hap ban sumar (ïa kiba pang) kumba sumar ïa kito kiba ïoh ïa kano-kano ka jingpang ‘Flu’.
Haba kylli, u la bynrap, “Kumba nga la ong, lada ki don ïa ki dak ki shin kum ka jingpang ‘Flu’, kin hap phikir bha khnang ba kin ym saphriang pat sha kiwei.”
Ha shuwa, ka komiti ki ‘riewshemphang halor ka koit ka khiah jong ka tnad ka koit ka khiah ka Jylla ka la khot ïa ka jingïalang hapoh ka jingpynïaid u Principal Secretary ban ïakren halor ki khubor ba ïadei bad ka jingpang HMPV kaba la mih ha ki lad pathai khubor bapher-bapher.
Ka komiti ka la peitngor ïa ka jingma kaba mynta bad khmih bniah ruh ïa ki lad jingpynkhreh jong ka tnad ka koit khiah ka Jylla ban ïakhun pyrshah ïa une u khñiang jingpang.
Ha kane ka jingïalang la ïoh ban pynsngew ba u HMPV um dei u khñiang jingpang bathymmai, hynrei uba la saphriang hapdeng ki paidbah la bun-bun snem mynta bad la lap ïa u ha u snem 2001.
Kumta la kyrpad ïa ki paidbah ban bud ïa ki kyndon ba kongsan jong ka khuid ka suba, kum ka jingsait kti ba man ka por bad ka jingdeng ïa ki jingkah khmut bad shyntur ne ki ‘mask’ lada jia ba don kino-kino ki dak ki shin jong ka jingpang ‘Flu’, ban pynduna ïa ka jingma na ki jingpang ring bad pynhiar mynsiem.
Shuh shuh, ka tnad ka la bynrap ba ka Integrated Disease Surveillance Programme (IDSP) kan dang ïai bteng ban peitngor ïa ka jinglong-jingman bad ka aiti ban pyntikna ïa ka koit ka khiah bad ka jingshngaiñ jong ki paidbah ha kane ka aïom.
Na ka liang ka tnad ka koit ka khiah ka Jylla ka long kaba la pynkhreh bad pynkhlaiñ ïalade ban ïakhun pyrshah ïa kino-kino ki jingeh kiba mih na ka jinglong-jingman jong ka jingpang.
