Shillong, K’lyngkot 16
U Myntri Rangbah ka Jylla, Conrad K. Sangma ha ka Sngi Palei u la plie ïa ka Rural Health Centre (RHC) ha Myrïaw, Eastern West Khasi Hills District ha ka jingdon lang u Myntri ka tnad kam ïalehkai, Bah Shakliar Warjri bad MP ka Rajya Sabha, u Dr. W.R. Kharlukhi.
Haba kren ha kane ka sngi, u Sangma u la ong ba ka tnad ka koit ka khiah ka dei kawei na ki tnad treikam kaba ïakynduh jingeh bha ha ka Jylla haba kdew ïa ka jingwanrah jingkylla ha ki jingtei jong ka tnad ha kine ki hynñiew snem ba la dep ban pynlong ïa ka jingsumar kaba kham suk na bynta ki paidbah nongkyndong.
Haba pynsngew ba ka Sorkar ka angnud ban wanrah jingkylla ha ka tnad ha ryngkat ka jingmang pisa kaba heh tam na ka bynta ka tnad ka koit ka khiah kaba long 9%, kaba long ruh kaba heh tam ha ka ri, u la ong ba kane ka dei ka jingpynpaw ïa ka jingthrang jong ka Sorkar.
Ïa kane ka RHC la bei pisa da ka CMSDF ha ka jinglut kaba T.38.8 lak, katba sa T.38 lak yn pyllait hadien.
Ka Myrïaw RHC ka kynthup ïa 21 tylli ki shnong bad la pynïaid ïa ka da ka Dr. H.G. Roberts Hospital, Shillong. Kane ka RHC ka dei kaba saw ban pynïaid da ka Hospital ha ka Jylla.
Haba ban jur halor ka bor jong ka jingïatreilang, u Myntri Rangbah u la ong ba katba ka Sorkar ka dang leh la ka jong ka kamram, ka jingkyrshan na ka imlang-sahlang bad ki kynhun seng kum ka Dr. H.G. Roberts Hospital, Shillong kan ai mynsiem jong ka jingïatylli ha ka ban wanrah jingkylla ban ïoh pdiang ïa ka jingsumar ha ka Jylla.
Kum ka jingai jingïaroh ïa ka jingtrei shitom jong ka Dr. H.G. Roberts Hospital, Shillong, u Myntri Rangbah u la pynbna ruh ba yn ai jingkyrshan ïa kawei ka Hospital kaba la pynïaid da ma ki ha Shillong ban kyntiew ïa ki jingtei jong ki na bynta ka jingshakri ‘Laser Lithotripsy’.
