Shillong, K’lyngkot 16
U Myntri Rangbah ka Jylla, Conrad K Sangma u la ong ba ha ki katto-katne kilometre ki jaka bym pat dep ker sainar shiah ha khappud India-Bangladesh, ka Sorkar kan wad ïa ki lad ki lynti ban pynbeit ïa ki jingeh khnang ban pyndep noh ïa ka jingker sainar shiah ha shilynter khappud jong ka Jylla bad ka ri Bangladesh..
U Conrad u la ong ba u la ïakren bad ki ophisar jong ka BSF, bad pyntip ba ki BSF ki la shim khia ban pahara bha ïa ki jaka bym pat ker sainar.
U la ong ba ka sorkar kan ïakren bad ki paidbah nongshong shnong ha kito ki jaka ki bym pat dep ker sainar shiah khnang ban pyndep ïa ka jingker sainar na bynta ka jingbit jingbiang ki paidbah kiba sah ha khappud.
“Ka rukom treikam jong ka sorkar jong ngi ka long beit ban shim ïa ki briew ha ka jingshaniah katba ngi dang pyrshang ban ïaid shakhmat. Hooid, ki don ki por ba katto-katne ka jingbym ïakren ka lah ban jia, hynrei ha kiba bun ki khep, ngi la ju shim ïa ki paidbah ha ka jingshaniah,” la ong u Conrad.
U la ong ba ha kane ka khep ruh ka sorkar ka kwah ban shim ïa ki paidbah ha ka jingshaniah, ban pynngeit ïa ki ba ka long kaba donkam.
Katkum ka jingong jong u Conrad na ka 443 km ka jingjrong ka khappud bad ka Bangladesh, kumba 50-60 km ka dang sah khlem jingker namar ka jingpyrshah na ki nongshong shnong.
“Sa shisien ha kine ki jaka, ki don ki jingsngewkhia ba la pynpaw da ki paidbah trai shnong. Ka long kaba eh bha ha ka jylla jong ngi, namar ba ki rukom bat khyndew jong ngi, kumta ngim lah ban leh eiei hynrei ngi donkam ban shim ïa ka rai jong ki paidbah”, u la ong.
Lah ban kdew ba ka jingsahkut noh ka jingker sainar shiah ha khappud India-Bangladesh ka dei namar ka jingpyrshah jong ki paidbah nongshong shnong ha ki jaka khappud, halor ka nongrim ba kin sa duh noh ïa ki jaka rep, da kaba dawa na ka Sorkar ba ka jingker sainar shiah ha khappud dei ban leh naduh ‘zero line’.
