Shillong, K’lyngkot 16
Ka Jylla Meghalaya ka la ïaid shakhmat ban pynkhlaiñ ïa ka hospital ban sumar ïa ka jingpang bampong (Cancer), bad na ka bynta kane ka la pan ruh ïa ka jingïarap na ka Tata Memorial Cancer Hospital na Mumbai ban kyrshan ïa ka Meghalaya ha ka ban wanrah ïa ka cancer hospital ha Shillong Civil Hospital.
Haba kren hadien ka jingïalang jong ka State Cancer Society, u Principal Secretary ka tnat Health & Family Welfare jong ka Jylla, Sampath Kumar u la ong ba ha ka jingïalang la ïakren sani bha kumno ban pynbha shuh shuh ïa ka jaka sumar jingpang bampong kaba don hapoh ka Jylla, ha kaba u la pyntip ruh ba ka tnat ka la ïakren kyrpang bad ka Tata Memorial Cancer Hospital ban pyndep noh ka jingthied ïa ka ‘Linear Accelerator (LINAC)’, kaba dei ka kor X-ray ban sumar ïa ka jingpang bampong.
U la ïathuh ba ïa kane ka kor la thied ha ka kyrteng jong ka Tata Memorial Cancer Hospital na ka bynta ka Jylla Meghalaya.
“Ka jaka sumar ka la don, ngi ïakren pat mynta ka sngi na ka bynta ban thied sa ïa kawei ka kor ‘Linear Accelerator (LINAC)’, kaba dei ka tiar ba khatduh ban thied na ka bynta ban sumar ïa ka jingpang bampong”, la ong u Kumar.
Une u heh ophisar u la ïathuh ruh ba ha ka jingïalang la bishar bniah ruh ïa ka jingtreikam ka cancer hospital jong ka Jylla.
U la pyntip ba na ki jingpynsngewthuh paidbah, kiba bun ki la sngewthuh ïa ka jingdonkam ban phah eksamin bad shah sumar kham kloi, bad bynrap ba na ka liang ka tnat ka la tyrwa ban pynheh shuh shuh ïa ka cancer hospital ha Shillong na ka hynñiew phew jingthiah ba don mynta.
“Ngi la pynlong shibun ki jingpynsngewthuh paidbah, bad bun ngut ki briew ki la wan shakhmat mynta, ki la sdang ban wan kham kloi. Ngi la buh ka jingtyrwa ban pynbun shuh shuh ki jingthiah”, u la ong.
U Kumar u la ong ruh ba ka tnat ka la pan jingïarap na ka Tata Memorial Cancer Hospital ban pyntbit ïa ki doktor ban sumar ïa ka jingpang bampong ha kiba la san, bad pyntip ba na ka liang katei ka hospital ruh ka la mynjur ban ïarap.
U Director ka North Eastern Indira Gandhi Regional Institute of Health and Medical Sciences (NEIGRIHMS), Prof. (Dr.) Nalin Mehta uba la don lang ha ka jingïalang ka State Cancer Society, u la ong ba ka jingpang bampong ha ka jylla Meghalaya ka la kiew stet, bad bynrap ruh ba ka Sorkar Jylla bad ka NEIGRIHMS ki ïatreilang ban ïakhun pyrshah ïa kane ka jingpang bampong.
U Dr. Mehta u la ong ba ka Sorkar Jylla ka la shim khia bha ban ïakhun pyrshah ïa ka jingpang bampong.
“Ka jingdon kiba pang bampong ha ka Jylla ka la kiew, bun ruh kiba la shah sumar. Nga hap ban ïaroh ïa ka jingshisha ba ka Sorkar Jylla ka la pyrshang da kaba eksamin ïa ki nongshong shnong, da kaba eksamin yn lah ban lap kloi ïa ka jingpang”, la ong u Director ka NEIGRIHMS.
