Shillong, K’lyngkot 17
U Dr. Sankey Shangpung uba dei u MDC ba mynta ka Bataw Lakadong konstitwensi, u la ong haba ki paidbah ki la jied ïa u da ka jingieid khlem da pyndonkam da ka pisa, kumta haba u la wanrah ïa ki kam pynroi u aiti ha ki nongkitkam shnong ba kin pyntrei.
U la ong biang ba lada ki paidbah ki jied ïa u nongmihkhmat da kaba shim pisa ha ka por ilekshon, lada u jop u hap ban trei hi ïa ka kam lada wan ki kam pynroi, namar u hap ban khyllie ïa ka jinglut.
U Dr. Sankey Shang-pung uba dei u Chairman ka Jaiñtia Hills Autonomous District Council (JHADC) uba dei u samla ba la pyndep ïa ka jingpule ha ka kyrdan Doctor of Philosophy (Ph.D) na skulbah North Eastern Hill University, Shillong un sa ïakhun biang ïa kane ka ilekshon MDC na kajuh konstitwensi kum u kyrtong ka NPP.
Ka Bataw Lakadong konstitwensi ha ka ilekshon MDC ka ïoh khyndiat ki shnong na u MLA ka Khliehriat konstitwensi bad khyndiat na ka MLA Sutnga Saipung konstitwensi kaba hap ha East Jaiñtia Hills District.
Ban tip kham bniah ïa ka jingïaid lynti jong u Dr. Sankey Shangpung ha kine ki hynriew snem ba u la long kum u MDC bad ïa ka thong ba un leh lada u shah jied biang, u Nongsaiñ Hima u la ïoh ban ïakynduh markhmat ha ka jaka treikam jong u.
U la pyntip ba ha kine ki hynriew snem ba u la long MDC u la pynlut haduh 60 hajar tyngka shi bnai na ka tulop lajong ban noh synñiang sha san tylli ki skul hapoh ka konstitwensi.
Shuh shuh u la ïathuh ba ha kane ka ilekshon kaba mynta ki paidbah kin sa rai namar baroh ki kyrtong kiba ïakhun kynthup ma u ki dei kiba wan na ka longïing baduk hynrei ki la don ha la ki jong ki kyrdan namar ka jingtrei shitom. U Dr. Sankey kum u kyrtong na ka seng NPP un hap ban ïakhun pyrshah ïa u kyrtong ka VPP, Bah Levenson Suchiang, Bah JR Pyrtuh na ka UDP bad uwei kyrtong shimet.
