Shillong, K’lyngkot 17
Ka 21-Mawphlang-Diengïei Konstitwensi kam dei ka shnong kaba sah dien ne sah dum ha ki liang baroh hynrei ka dei ka konstitwensi kaba la shai bad ba la kham paw ha ki kam baroh khamtam eh ha ki kam jngohkai pyrthei bad ka long ruh kaba ïar bad kaba heh shibun. Kumta ka don ïa ki khraw pyrkhat kiba donburom bad ki khlur ba paw ha ka Jylla bad ka Ri hi baroh kawei.
Hynrei kaba phylla ka long ba ki dang don hi pat ki briew kiba ong ban ïakhun ïa ka ilekshon ha kane ka konstitwensi hap ban da don shwa ïa ka pisa bad nangta sa mih shakhmat ban ïakhun ïa ka ilekshon.
“Kane ka pynpoh dor bha ïa ka konstitwensi jong ngi. Hooid, ka pisa ka donkam ym ïa u paidbah hynrei tang na bynta jong u ne ka kyrtong ki ban ïakhun ïa ka ilekshon ban pynlut ha ka bai leit-bai wan bad ka bai sha-bai dud ym ïa u paidbah bapli”, ong ki nongshong shnong.
Na ka liang ki katto-katne ngut ki nongshong-shnong kiba don ka jingkitkhlieh ïa ka konstitwensi ki la pynpaw ruh ba ha ka jingleit ban ïakynduh ïa kiba bun ngut ki paidbah hapoh ka konstitwensi ban lap ïa ka jingshisha halor kane la buh ïa ka jingkylli sha kitei ki paidbah halor kata ka jingdon ka jingpynbam pisa da ki kyrtong kiba ïakhun ïa ka ilekshon hapoh ka konstitwensi. Na ka liang kitei ki paidbah baroh ki la pynpaw ba kata ka jingpynbam pisa ka long tang ka ktien hynrei ym pat don iwei ruh napdeng ki paidbah ki ban ong ba ki la sakhi ïa kata ka jingpynbam pisa bad kiba bun hi ki paidbah ki la ong ba kam don satia kaba kum kata hapoh ka konstitwensi.
“Ki long ki paidbah kiba shisur-shidur bad kiba kloi bha ban shaniah. Na kata ka daw, ngim lah ban ong ba ka long kumne lane kumtai khlem da sakhi ïa ki kam pynbam pisa”, ong ki nongshong-shnong.
Shuh-shuh, kitei ki nongshong shnong ki la ong ba lehse, kita kiba ong ba ka don kum kane ïoh ka dei pynban ba ma ki hi ki dei kita ki nongsam lane ki nongai pisa namar ki la tip kham bha bad ba ki la ju mlien ïa kine ki jait kam, bad lada ka long kumta ruh, ki paidbah jong ka konstitwensi ki long kiba stad bad kin ïatrei lang ban kem ïa kiba donkti ban sam pisa bad ban pyntip ruh sha ka tnat jong ka Election Commission ba kan leh ïa kaba donkam.
