Shillong, K’lyngkot 17
U President ka National People’s Party (NPP) Meghalaya State Unit uba dei ruh u Symbud Myntri Rangbah ka Jylla, Bah Prestone Tynsong u la ong ba ha synshar paidbah kino-kino ki don ka hok ban mih na kano-kano ka seng bad leit ïakhun ïa ka ilekshon na kawei pat ka seng.
Kane ka jingkren u Bah Prestone ka long haba kylli halor ka jingphet bad jingmih noh ki dkhot bad nongïalam ka NPP shwa ka ilekshon MDC ban leit pynïasoh noh bad kiwei pat ki seng bad don ruh kiba la rai ban ïakhun ïa ka ilekshon kum ki kyrtong shimet.
Haba kren ha ka Sngi Thohdieng, u Nongïalam ka NPP u la ong ba um don eiei ban ong halor ka jingmih noh jong katto-katne ngut na ka seng shwa ka ilekshon.
“Phi don ka hok ba phin leh ïa kata, la phi kwah ban ïakhun na ka BJP, na kiwei ki seng lane kum ki kyrtong shimet ruh phi don ka hok, namar ka Riti Synshar ka ri India ka ailad ban leh kumta. Ngam don eiei ban ong, ka shong ha ki, ka shong ha ka rukom pyrkhat bad jingtip ka jong ki”, la ong u Bah Prestone.
Lah ban pynpaw ba ka jingshah kynnoh bad shah kynthoh jong ka Sorkar ba ïalam da ka NPP ka jur katta-katta haduh bun na ki nongshong shnong ki la sdang ban kren bad kylla na ki MDC bad ki kyrtong ba thmu ban ïakhun ïa ka ilekshon MDC ka ban sa long ha u Rymphang mynta u snem.
