Shillong, K’lyngkot 17
U Bah Prestone Tynsong uba dei u Symbud Myntri Rangbah ka Jylla, u la ong ba ka dei ka kamram jong ka Liang Pyrshah ban kynnoh bad kynthoh ïa ka Sorkar, bad lada kim leh kumta ki MLA ba don ha ka Liang Pyrshah kin jah kyrteng noh.
Ïa kane u Bah Prestone u la ong, haba kylli halor ki jingshah kynnoh ba laiphew jait ïa ka Sorkar Meghalaya Democratic Alliance (MDA-II) ba ïalam da ka National People’s Party (NPP), khamtam ka jingshah kynnoh bamsap kaba lah ban ktah ïa ka seng ha kane ka ilekshon MDC ka ban sa long ha u bnai Rymphang.
“Ngam ïohi ba kan don kano-kano ka jingktah. Lada phi ïakren ïa kata ka bamsap, nga tharai kano-kano ka Liang Pyrshah, kano-kano ka seng ka bym don ha ka Sorkar ki kynnoh beit ïa ka Sorkar ba ka dei kaba bamsap la ka dei hangno-hangno ruh. Kumta la ka dei ka VPP ne kiwei ki seng, ka dei ka kamram jong ki ban kren kumta. Wat ma nga, lada nga don ha ka Liang Pyrshah nga hap ban kren kumta, lym kumta ka kyrteng jong phi kan jah noh”, la ong u Bah Prestone, da kaba bynrap shuh shuh ba kane kam dei kaei-kaei kaba dang thymmai.
U la ong ba ïa mynta um kwah ban kren palat halor kane, hynrei kaei kaba donkam mynta ban peit ka long 24 tarik Rymphang kaei ka ban mih, hangta yn sa sngewthuh.
Haba kylli, une Nongïalam ka NPP u la ong ba kumno kan don ka jingisih ïa ka Sorkar lane kan don ka jingkyntait ïa kiba synshar mynta haba kane ka Sorkar ka la leh shibun ki kam na ka bynta ka bit ka biang ki paidbah ka Jylla da kaba jer kyrteng ruh ïa ki projek jong ka tnat PWD (Roads) kaba dang pyntreikam shaid-shaid mynta.
“Phi lah ban mutdur, ba ka Meghalaya kaba dei ka Jylla kaba rit kan ïoh shibun ki projek bad ki skhim. Ka ïoh namar ba ka Sorkar ka trei, ka Sorkar ka lah ban pynkohnguh ïa ka Sorkar India. Ngi khlem pynlut por hangne tang ban kdew kti ba utai uba long kumta, une uba long kumta, ngim don por ban leh ïa kata”, u la ong.
U la ong shuh shuh ba kum ki nongïalam hapoh ka Sorkar Jylla, ka kamram bad ka por ka jong ki ka long ban leit sha Delhi ban kyrpad na ka Sorkar Pdeng ïa ki jingdonkam ka Jylla.
“Ngi don ka por ban leit sha Delhi ryngkat ka bul da kaba pyndait ki kti ban ong sngewbha ai ïa ngi, kam pher la ngi hap ban nguh ïa ka khlieh na ka bynta ka jingmyntoi ka Jylla. Ngi duh thiah duh dem, kumno ban wanrah ki skhim na ka bynta ka Jylla”, la ong u Bah Prestone.
