New Delhi, K’lyngkot 17
Ka Central Seat Allocation Board (CSAB) – 2025 ka la kyntu ïa ki samla ka Thaiñ Shatei Lam Mihngi ban pynrung kyrteng na ka bynta ka Joint Entrance Examination (JEE) Main, 2025.
Ka jingpynrung kyrteng na ka bynta ka samoi 2 (Ïaïong 2025) kan sdang ha ka 31 tarik u Kyllalyngkot, 2025 bad kan kut ha ka 24 tarik u Rymphang, 2025. Ki samla kiba lah ban ïashim bynta ki lah ban leit sha ka https://jeemain.nta.nic.in/information-bulletin/ ban ïoh ïa ki jingtip kham bniah.
U Chairperson ka CSAB, Prof. K. Umamaheshwar Rao u la ong, “Ka Thaiñ Shatei Lam Mihngi ka don ïa ki samla don sap bad kiba don bun ki lad. Nga kyntu ïa ki samla don sap na ka thaiñ ba kin shim ïa ka kabu bad pynrung kyrteng na ka bynta ka eksam JEE (Main), 2025. Ka jinglah ban pyndep ïa kane ka eksam kaba don burom ka lah ban wanrah ïa ka jingkylla ha ka jingim, ka ban aibor ïa ki na ka bynta ka lawei ha ka ‘saïan’ bad ka teknoloji.”
Da kaba ithuh ïa ki jingeh ba kyrpang ba ki samla na ka Thaiñ Shatei Lam Mihngi bad na ki Union Territory ki ïakynduh, ka CSAB ka la ai ïa ki lad ba kyrpang lyngba ki jingïasyllok kum ka CSAB-NEUT (ki Jylla ka Thaiñ Shatei Lam Mihngi bad katto-katne ki Union Territory) ban pynbiang ïa ki ‘seat’ ha ki skulbah ba la ïoh jingithuh da ka AICTE bad kiwei-kiwei ki skulbah ha kylleng ka India hapoh ka skhim kaba la buh kyrpang ha ka kyrdan ‘Degree Level Technical Course’ na ka bynta ki Jylla / UT ki bym don ïa kine ki jingai jingshakri ha ki jaka pule ba la ïoh jingithuh na ka AICTE.
Ha u 2025, la khmih lynti kumba 2000 tylli ki ‘seat’ kin lait ha ka ‘State Quota’ na ka bynta ki NIT, IIT bad GFTI ha ki Jylla ka Thaiñ Shatei Lam Mihngi, ha ryngkat 740 tylli ki ‘seat’ ha kylleng ka India hapoh ka thup NEUT.
